بو گئجه یوخوما حرام قاتمیشام؛
بو گئجه یولدایام گؤر هاردان- هارا.
آرزو ائله شئیدی سرحد تانیمیر
امید دوشرسه ده لاپ داردان- دارا.
بو گئجه گؤیده‌‌یم، یئرده دئییلم؛
بو گئجه قانادلی قوش کیمی‌یم من.
خیال اولماسایدی منیم همدمیم
دئیردیم بیر پارچا داش کیمی‌یم من.
بو گئجه گؤر نئجه دؤیور اوره‌ییم
بو گئجه ائله بیل اون دؤرد یاشیم وار.
ائله بیل غربتده تک، تنها دئییل
دؤورمده نه قده‌ر دوست، یولداشیم وار.
بو گئجه کپه‌نک قانادلی‌یام من؛
بو گئجه اینجه‌دی دویغولاریم دا،
دوزدی کی، چوخداندی باتیب قالمیشام
من اؤز توخودوغوم اویغولاریمدا.
بو گئجه گنجلشیب دوشونجه‌‌لریم؛
بو گئجه سیخیلماق مندن اوزاقدی.
ائله بیل «گون دوغدو» یایلاغیندایام
یورولوب داریخماق مندن اوزاقدی.
بو گئجه «سهند»ه قوناق اولموشام؛
بو گئجه کئچمیشم من «ساوالان»دان.
هئچ نه ده‌ییشمه‌ییب، هئچ نه!– من یئنه
اونلارا باغلی‌یام اوره‌کدن، جاندان…
بو گئجه یوخوما حرام قاتمیشام؛
بو گئجه یولدایام گؤر هاردان- هارا.
آرزو ائله شئیدی سرحد تانیمیر
امید دوشرسه ده لاپ داردان- دارا.
