۱- آدام
تک قول آدام دا آدام‌دیر
جوت قول آدام دا آدام.
تک گؤز آدام دا آدام‌دیر
جوت گؤز آدام دا آدام؛
فقط آدامدان آدام
فرقله‌نیر بیر بونا:
او آدام کی آدام‌دی
گونده گیرمیر مین دونا.
۲- بوز خنجری
یاز آیلاری
داغ دؤشوندن آخان چشمه،
قیش آیلاری
داغ کؤکسونده دونوب، قالدی!
آنجاق داغا درد اولمادی.
یاز نفسلی اولدوغونو دویسا اوره‌ک
هئچ بیلیرسن نه اولاردی؟!
داغ، چشمه‌نین بوز خنجرین اونودان تک
سندن گلن آغری‌لاری،
اوره‌ک بیر باش اونوداردی.
