index
باليق‌ اولاجاغام‌
حبیب فرشباف

 آنا مني‌ اوياتما

من‌ هله‌ ده‌ ياتميشام‌،

 شيرين‌ يوخولاريم‌لا

هئی‌ باشيمي‌ قاتميشام‌.

 اَل‌ – اوز يوماق‌ درديندن‌

دورانميرام‌ يوخودان‌،

 آنا بيلميرم‌ نه‌ دن‌

يامان‌ قورخورام‌ سودان‌!

 خئيري‌ اولسون‌ باليغين‌

 گئجه‌ – گوندوز اوينايير،

 نه‌ يوخودان‌ دوراندا

 گئديب‌ ال‌ – اوزون‌ يويور.

 نه‌ هر غذادان‌ سونرا

يوياجاقدير ديشلرين‌،

 او اوينايا – اوينايا

گؤرور تامام‌ ايشلرين‌.

 آنجاق‌ بو ايشلر اوچون‌

 مني‌ سئومه‌‌يير آنام‌،

 من‌ ده‌ تنبل‌ليگيمدن‌

بير باليق‌ اولاجاغام‌.