Home / ترجومه‌ / هئچ کیمسه‌یه اوخشامایان/ فروغ فرخزاد- چئویرن: مقصود تقی‌زاده هریس(نیسگیل)

هئچ کیمسه‌یه اوخشامایان/ فروغ فرخزاد- چئویرن: مقصود تقی‌زاده هریس(نیسگیل)

هئچ کیمسه‌یه اوخشامایان
فروغ فرخزاد- چئویرن: مقصود تقی‌زاده هریس(نیسگیل)

او گله‌جک
من یوخومدا گؤرموشم
من یوخومدا قیزیل بیر اولدوز گؤرموشم.
گؤزوم سئیری‌ییر
باشماقلاریم جوت‌لنیر
کور قالیم یالان سؤیله‌سم
من او قیزیل اولدوزون یوخوسونو
اویاقلیقدا گؤرموشم.
او گله‌جک
او گله‌جک
او باشقادیر
او یاخشی‌دیر
او کیمسه‌یه اوخشامیر
او آتاما اوخشامیر
او «انسی»‌یه اوخشامیر
او «یحیی»یا اوخشامیر
او آناما اوخشامیر
او یالنیز
بیر کیمسه‌یه اوخشاییر کی گرک‌دیر.
اونون بویو
«معمار»ین حیه‌تینده کی آغاجلاردان اوجادیر
اونون اوزو
«امام زمان»ین اوزوندن ده نورلودور
«سید جواد»ین قارداشیندان دا قورخمور
– پولیس پالتاری گئیسه ده-
لاپ بئله هئچ
سید جواددان دا قورخمور
-ائویمیزین بوتون اوتاقلاری اونوندور سا-
اونون آدی
آنام نامازلارینین
ایلکینده و سونوندا
سسله‌دییی آدلاردیر:
یا «قاضی القضات»‌دیر
یا «حاجت الحاجات»‌دیر.
او، اوچونجو صینیفین کیتابینین بوتون چتین حرفلرینی
گؤزو یومولو اوخویار
«مین»ی – اسگیک گتیرمه‌دن-
ییرمی‌میلیوندان چیخار
هر نه گؤیلو ایسته‌سه
سید جوادین توکانیندان
بئداوا آلا بیلر.
او، تاواندان آسلانان
-دان یئری تک پارلایان یاشیل«الله» نئونونو
«مفتاحیان» مچیدینین اوستونده یاندیرا بیلر.
آخ…
نه قده ر گؤزل‌دیر ایشیق!
نه قده ر گؤزل‌دیر ایشیق!
آخ…
ایسته ییرم یحیی نین
بیر دؤرد ته‌یرلی داشقاسی اولسون
بیر «زنبوری» چیراغی.
ایسته‌ییرم
او داشقانین اوستونده
قوهونلارین- قارپیزلارین آراسیندا اوتورام
«محمدیه» مئیدانیندا فیرلانام.
آخ…
نه قده ر گؤزل‌دیر
مئیدانلاردا فیرلانماق،
گئجه‌لر دامدا یاتماق،
«باغ میللی»‌یه گئتمک!
آخ…
نه قده‌ر گؤزل‌دیر
«پئپسی»نین دادی،
«فردین» سینماسی!
من بوتون گؤزل شئی‌لری سئویرم.
ایسته‌ییرم
سید جوادین قیزینین باشینی یولام.
نییه من بو قده‌ر خیرداجایام، نارینم
خیاواندا ایتیرم؟!
آتام- کی خیرداجا دئییل، نارین دئییل-،
خیاواندا دا ایتمیر،
آخی نییه بیر ایش گؤرمور؟
«ساللاخ خانا» کوچه‌سینین جاماعاتی
– باغچالارینین تورپاغی قانلی‌دیر سا،
حوووض‌لارینین سویو قانلی‌دیر سا،
باشماقلارینین آلتی قانلی‌دیر سا-
نییه بیر ایش گؤرمورلر
نییه بیر ایش گؤرمورلر
کی یوخوما گلن کیمسه
گلیشی‌نین واختینی
بیر گون سالا قاباغا؟!
آخ… نه قده ر ارینگج‌دیر قیش گونشی!
دام یولونون پیلله‌لرین سیلمیشم – سوپورموشم
پنجره‌نین شوشه‌لرین یوموشام.
آتام نییه گره‌ک
یالنیز یوخلایاندا یوخو گؤره؟
دام یولونون پیلله لرین سیلمیشم – سوپورموشم
پنجره نین شوشه لرین یوموشام.
او گله‌جک
او گله‌جک
او اوره‌کدن بیزیمله‌دی،
نفه‌سینده بیزیمله‌دی،
سسینده بیزیمله‌دی.
اونون گلیشی‌نین قاباغینی آلماق اولماز
قولونا کلبچه ووروب
زیندانا سالماق اولماز.
او، یحیی نین قوجا آغاجلارینین آلتیندا بالالاییب
گون به گون ده بؤیویور.
او یاغیشدان،
یاغیشین شیرهاشیریندان
اطلسی گوللرینین اینجه پیچیلتیسیندان
«توپ خانا» دا «اود یاندیرما» گئجه‌سی
گؤیده فیرلانان اودلاردان- ایشیقلاردان گله‌جک
دستارخانی آچاجاق
پئپسی‌نی بؤله‌جک
باغ میللی‌نی بؤله‌جک
اؤسکوره‌ک شربتینی بؤله‌جک
خسته خانا بیلیتینی بؤله‌جک
نایلون چکمه‌لری بؤله‌جک
فردین سینماسینی بؤله‌جک
و هر جوره شیشن- یئلله‌نن شئیی بؤله‌جک
بیزیم ده پاییمیزی وئره‌جک
من یوخومدا گؤرموشم…

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *