گؤزله‌رم یول نه قده‌ر گؤزلریمین وار ایشیغی
گونشیم دؤن، قارالان عؤمرومه قایتار ایشیغی
بیر گؤروش آرزیسینی باغریما باسدیم، نئجه کی-
گون باتان واختی باسار باغرینا داغلار ایشیغی.
او یاشیل گونلره کئشکه قاییدام بیر کره ده
دوداغیندان سوزوله وارلیغیما نار ایشیغی.
گؤزلریم اؤیله قاماشدی باخاراق اللرینه
قایتارار قیشدا نه جور کی گؤزومه قار ایشیغی.
گؤزلریندن ایچیمه آخدی بیر اولدوز کی گؤزوم-
گئجه قوینوندا قارانلیقدا سایاقلار ایشیغی.
بیرخبر یوخدو هله سن کیمی ایتگین آیدان
نئچه آیدیر، نئچه ایلدیر چکیرم جار ایشیغی.
قیوریلاندا ساچین آلنیندا دوشوندوم کی چتین-
قارا زنجیر گتیره بختیمه قانشار ایشیغی!
۷/۹/۱۳۸۹- هریس
