سئوگیلیمین کندینه گئدرکن…
مقصود تقی زاده هریس(نیسگیل)
بو نه توزدو، داغ، دره، دوز گؤرونمور
یولدا یولچو، جیغیردا ایز گؤرونمور
تندیرده اود، اوجاقدا کؤز گؤرونمور
حسرت چکدی گؤزلریمه پرده، هئی…
***
شن گونلردن خبر- اثر یوخدو هئچ
شادلیق، سئوینج بو اویماقدان چاتیب کؤچ
آددیم آتدیم ایره لی بیر…ایکی…اوچ
دیزیم اسدی یئتنمه دیم دؤرده، هئی…
***
آی سئوگیلیم نه سن وارسان، نه ائویز
گل کی واردیر سون گؤروشه وعده میز
تورپاقلارلا دولوب گؤروش یئریمیز
داش گؤیه ریب سن دایانان یئرده، هئی…
***
ازیلیبدیر بویلاندیغین پنجره
توز یاتیبدیر کردی ده کی گوللره
غم آزالمیر آه چکیرم مین کره
کیم دؤزرمی بئله آغیر درده، هئی…
***
آمان فلک بو نه کده ر، بو نه غم
بو نه سئودا، اورکده کؤز، گؤزده نم
آی سئوگیلیم گل گئدیرم، بیلمیرم
بو یئرلره یولوم دوشه بیر ده، هئی…
