او گله‌جک
من یوخومدا گؤرموشم
من یوخومدا قیزیل بیر اولدوز گؤرموشم.
گؤزوم سئیری‌ییر
باشماقلاریم جوتله‌نیر
کور قالیم یالان سؤیله‌سم
من او قیزیل اولدوزون یوخوسونو
اویاقلیقدا گؤرموشم.
او گله‌جک
او گله‌جک
او باشقادیر
او یاخشیدیر
او کیمسه‌یه اوخشامیر
او آتاما اوخشامیر
او «انسی»یه اوخشامیر
او «یحیی»یا اوخشامیر
او آناما اوخشامیر
او یالنیز
بیر کیمسه‌یه اوخشاییر کی گرک‌دیر.
اونون بویو
«معمار»ین حیه‌تینده کی آغاجلاردان اوجادیر
اونون اوزو
«امام زمان»نین اوزوندن ده نورلودور
«سید جواد»ین قارداشیندان دا قورخمور
– پولیس پالتاری گئیسه‌ده-
لاپ بئله هئچ
سید جواددان دا قورخمور
-ائویمیزین بوتون اوتاقلاری اونوندورسا-
اونون آدی
آنام نامازلارینین
ایلکینده و سونوندا
سسله‌دییی آدلاردیر:
یا «قاضی القضات»دیر
یا «حاجت الحاجات»دیر.
او، اوچونجو صینیفین کیتابینین بوتون چتین حرف‌لرینی
گؤزو یومولو اوخویار
«مین»ی – اسگیک گتیرمه‌دن-
ییرمی میلیوندان چیخار
هر نه گؤیلو ایسته‌سه
سید جوادین توکانیندان
بئداوا آلا بیلر.
او، تاواندان آسلانان
-دان یئری تک پارلایان یاشیل«الله» نئونونو
«مفتاحیان» مچیدینین اوستونده یاندیرا بیلر.
آخ…
نه قده‌ر گؤزل‌دیر ایشیق!
نه قده‌ر گؤزل‌دیر ایشیق!
آخ…
ایسته‌ییرم یحیی‌نین
بیر دؤرد ته‌یرلی داشقاسی اولسون
بیر «زنبوری» چیراغی.
ایسته‌ییرم
او داشقانین اوستونده
قوهونلارین- قارپیزلارین آراسیندا اوتورام
«محمدیه» مئیدانیندا فیرلانام.
آخ…
نه قده ر گؤزل‌دیر
مئیدانلاردا فیرلانماق،
گئجه‌لر دامدا یاتماق،
«باغ میللی»یه گئتمک!
آخ…
نه قده‌ر گؤزل‌دیر
«پئپسی»نین دادی،
«فردین» سینماسی!
من بوتون گؤزل شئی‌لری سئویرم.
ایسته‌ییرم
سید جوادین قیزینین باشینی یولام.
نییه من بو قده‌ر خیرداجایام، نارینم
خیاواندا ایتیرم؟!
آتام- کی خیرداجا دئییل، نارین دئییل-،
خیاواندا دا ایتمیر،
آخی نییه بیر ایش گؤرمور؟
«ساللاخ خانا» کوچه‌سینین جاماعاتی
– باغچالارینین تورپاغی قانلی‌دیر سا،
حوووض‌لارینین سویو قانلی‌دیر سا،
باشماقلارینین آلتی قانلی‌دیر سا-
نییه بیر ایش گؤرمورلر
نییه بیر ایش گؤرمورلر
کی یوخوما گلن کیمسه
گلیشی‌نین واختینی
بیر گون سالا قاباغا؟!
آخ… نه قده ر ارینگج‌دیر قیش گونشی!
دام یولونون پیلله‌لرین سیلمیشم – سوپورموشم
پنجره‌نین شوشه‌لرین یوموشام.
آتام نییه گره‌ک
یالنیز یوخلایاندا یوخو گؤره؟
دام یولونون پیلله‌لرین سیلمیشم – سوپورموشم
پنجره‌نین شوشه‌لرین یوموشام.
او گله‌جک
او گله‌جک
او اوره‌کدن بیزیمله‌دی،
نفه‌سینده بیزیمله‌دی،
سسینده بیزیمله‌دی.
اونون گلیشی‌نین قاباغینی آلماق اولماز
قولونا کلبچه ووروب
زیندانا سالماق اولماز.
او، یحیی‌نین قوجا آغاجلارینین آلتیندا بالالاییب
گون به گون ده بؤیویور.
او یاغیشدان،
یاغیشین شیرهاشیریندان
اطلسی گوللرینین اینجه پیچیلتیسیندان
«توپخانا» دا «اود یاندیرما» گئجه‌سی
گؤیده فیرلانان اودلاردان- ایشیقلاردان گله‌جک
دستارخانی آچاجاق
پئپسی‌نی بؤله‌جک
باغ میللی‌نی بؤله‌جک
اؤسکوره‌ک شربتینی بؤله‌جک
خسته خانا بیلیتینی بؤله‌جک
نایلون چکمه‌لری بؤله‌جک
فردین سینماسینی بؤله‌جک
سید جوادین قیزینین
آغاجلارینی بؤله‌جک
و هر جوره شیشن- یئلله‌نن شئیی بؤله‌جک
بیزیم ده پاییمیزی وئره‌جک
من یوخومدا گؤرموشم…
مقصود تقی‌زاده هریس (نیسگیل)
فروغ فرخزاد
چئویرن: مقصود تقی‌زاده هریس (نیسگیل)
ترجمه: مقصود تقی‌زاده هریس (نیسگیل)
سسلندیرن: مقصود تقی‌زاده هریس (نیسگیل)
- شعر
- اوخوماق زامانی: 2 دقیقه
- https://ishiq.net/?p=18266
فروغ فرخزاد
چاپ
یک پاسخ
گوزل ترجمه دیر، ساغ اولون…
فروغ فرخزادین سئچیلمیش شعرلرینین تورکجه چئوریسی، اولکر یایین ائوی طرفیندن، “وئره جه یم گونشه بیر داها سلام” کیتابیندا نشر ائدیلیب کی بو شعرین تورکجه سینی سیزینله پایلاشیرام:
هئچ کیمسه یه اوخشامایان بیریسی !
یوخودا گؤرموشم بیریسینین گلمه یینی
بیر قیرمیزی اولدوز گؤرموشم یوخودا
گؤزوم هئی آتیر
باشماقلاریم دا هئی جوتلشیرلر
کور اولوم
سیزه یالان دئسم
او قیرمیزی اولدوزون یوخوسون
اویومایان آن دا گؤرموشم
بیریسی گلیر
بیریسی گلیر
بیریسی داها
یاخشی بیریسی
هئچ کسه اوخشامایان بیریسی، آتایا اوخشامیر، “انسیه”یه ده اوخشامیر
“یحیی”یا اوخشامیر ، آنایا اوخشامیر
گره¬کلی اوخشایاجاغینا اوخشاییر
اونون بویو، معمارین ائوینین آغاجلاریندان دا اوجادیر
اوزو،
امام زمانین اوزوندن، داها ایشیقلی.
او گئدیب گزمه پالتاری گئیینن
سید جوادین قارداشیندان دا قورخماییر
بیزیم ائویمیزین اتاقلارینین هامیسی اونونکو اولان
سید جوادین اؤزوندن ده قورخماییر
اونون آدی، آنام نامازینین باشلانیشی و سونوندا سسله ین کیمی
قاضی القضاتدی
یا دا حاجت الحاجات
او اوچونجو کلاسین کتابینین بوتون چتین سؤزلرین
گؤزو باغلی اوخویا بیلیر
او آرتیق-اسگیک گتیرمه دن
مینی، ییرمی میلیوندان چیخا بیلیر
هله او سید جوادین دوکانیندان
ایسته دیییجه، نسیه اشیاء گؤتوره بیلیر.
او “مفتاحیان” مسجدینین اوستونده¬کی
یاشیل بویالی، سحر گؤیو کیمین یاشیل بویالی
“الله” لامپاسینی یاندیرا بیلیر
آخ……
آیدینلیق نه قدر یاخشیدیر!
آیدینلیق نه قدر یاخشیدیر!
و منیم نه قدر کؤنلوم ایسته ییر
کی یحیانین
بیر ال داشقاسی اولسون
و بیر پیله ته سی.
و نه قدر ایسته ییرم
یحیانین ال داشقاسیندا،
قارپیزلار و قووونلارین آراسیندا اوتوروب
محمدیه میدانین فیرلانام
آخ…..
میدانی فیرلانماق نه قدر یاخشیدیر
دام اوستونده یاتماق نه قدر یاخشیدیر
ملّی باغینا گئتمک نه قدر یاخشیدیر
پئپسی نه قدر دادلیدیر
فردینین سینماسی نه قدر خوشدور
نه قدر کؤنلوم ایسته ییر
سید جوادین قیزینین ساچین یولام
نیه من بو قدر خیرداجایام
کی خیابانلاردا ایتم؟
هئچ ده خیرداجا اولمایان آتام نه دن
خیابانلاردا دا ایتمه ییر؟
منیم یوخودا گؤردویومون تئز گلمه سینه
هئچ ایش گؤرمه ییر
و باغچالارینین تورپاغی
حوضلارینین سویو
و باشماقلارینین آلتی قانلی اولان
کشتارگاه محلّه سینین اهالیسی
نه دن هئچ ایش گؤرمورلر
نه دن هئچ چالیشمیرلار؟
نه قدر قیشین گونشی یئییب یاتاندیر!
من دام یولونون پیلله لرین سوپورموشم
پنجره لرین شیشه سینی یوموشام
نیه آتا آنجاق یوخودا
یوخو گؤره بیلیر؟
من دام یولونون پیلله لرین سوپورموشم
و پنجره نین شیشه سینی یوموشام
بیریسی گلیر
بیریسی گلیر
اوره یی بیزیمله دیر اونون، نَفَسی بیزیمله دیر
اونون گلمه یینین
قاباغینی آلماق اولماز
اونا کلفجه ووروب
دوستاغا گؤندرمک اولماز
یحیانین یاشلی آغاجلاری آلتیندا دوغولان بیریسی
گونوگوندن بؤیویور
و داها بؤیویور
یاغیشدان اولان بیریسی، یاغیشین شیریلتیسیندان
اطلسی گوللرین پیچیلتیسیندان گلن بیریسی،
شنلیک گونلرینده توپخانانین فیش-فیشالی گؤیوندن، گله جک
و سوفره سالاجاق
و یئمک وئره جک
پئپسی پایلایاجاق
و میللی باغی بؤلوشدوره جک
قارااؤسگورمه شربتی پایلایاجاق
و آد یازما گونون سیرالایاجاق
و خسته خانانین وقتین بؤله جک
رئزین چکمه لری پایلایاجاق
فردینین سینماسین بؤله جک،
سیدجوادین قیزینین آغاجلارین بؤله جک،
هر نه شیشمیش اولورسا بؤله جک
بیزیم پاییمیزی دا وئره جک بیریسی
من یوخو گؤرموشم…