دوم- دورو
مقصود تقی‌زاده هریس(نیسگیل)
گؤزلرینه
دورو گله‌جه‌یم
دوم- دورو…
اؤزومله گتیرمه‌یه‌جه‌یم
نه هاوانین توستوسون،
نه ماشینلار ویژیلتیسین،
نه بئنزین
نه اودکولون قوخوسون!
چیلپاق گله‌جه‌یم،
هر نه دن چیلپاق
سئوگیمه بورونه‌جه‌یم
یالنیز.
دومان کیمی سورونه‌جه‌یم
آی قیز
گیله‌لری‌نین زیروه‌لرینده.
گؤزلرینده باتاجاغام
لاپ درینده!
گؤزلرینه
چیلپاق گله‌جه‌یم
گئری دؤنمه‌یه‌جه‌یم
آرخادا قویاجاغام
سیر- سیرالی باخیشلاری
کیف توتموش ایناملاری،
بیج گولوشلری،
پاس باسمیش سؤزلری،
بولانلیق گؤزلری…
بیر چیرتمیق داشی آتیمی قده‌ر
بولانمایاجاق
گؤزلری‌نین دنیزی.
توک قده‌ر جیزیلمایاجاق
باخیشی‌نین آیدین گوزگوسو!
بیر دامجی قارانلیق داممایاجاق
گؤزلری‌نین آغ سحرینه،
بیر چیمدیک ده آزالمایاجاق نورو،
گؤزلرینه
دورو گله‌جه‌یم
دوم- دورو…
۲۱/۱/۱۳۹۲
