او تایدان مکتوب
سحر خیاوی

(مهسا عبدالعلی‌زاده دوستوموزون روحونا سونولور)

آیلی-اولدوزلو یای گئجه‌لرینی سئوردیم دوستوم،
سَرین مِئه ساچلاریمی‌اوخشایارکن ائیوانیمیزدا اوتورماغی
خولیالارا دالماغی و باشیم چیینینده شعر یازماغی…
یئتردی ایکی دیلیم قارپیز اولسون یوخسا ایکی ایستیکان گیلانار چایی

بیر جیغیر قویایدین هئچ اولماسا اینصافسیز،
گئجه‌لر، آی-اولدوز قوناق گلسین قارانلیق داخماما.
دویغولاریم قورخوشور گئجه‌لر
بوردا، بو داریسقال ائویمده
دؤرد چئوره‌م قاپ-قارا دوواردیر
و… بو آغیر داش، تاوانیم
داریخمالاریمی‌دیرناقلاریملا جیزیرام دووارلارا
ایلکین آدام کؤهول دووارلارینا جیزان کیمی.
بارماقلاریم اوشویور
اولورسا یازار الیمه بیر الجک گتیر
بیرده بیر قلم-دفتر
نئت ایشله‌مَز
تئلئفونلار آنتن وئرمز بورالاردا
بارماقلاریمی‌سؤزجوکلره چئویره‌جم
دفتره اکه‌جم
چورومَز اولسونلار
و منی یاری یولدا قویان یولسوز آیاقلاریمدان قاریشقالارا گیلئیله‌نه‌جم
مومکون اولماسا اوزولمه آرتیق
یالنیز گؤزللیک‌لری گؤردوکده منیم‌ده گؤزلریمله باخ
اینجه سؤزلر ائشیدنده منی‌ده یاد ائله
یئنی کیتابلاری اوخویاندا منی‌ده دوشون

آناما دئنن: آغلاماسین آرتیق
داریخاندا من اوچون
سئودیگیم آیلی اولدوزلو سَمایه باخسین
او سایریشان اولدوزلارین بیری منم
اؤلمه‌میشم
یالنیز اولدوزا چؤنموشم….
اولدوزا چؤنموشم….