ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

saeed fiyuzat
“حيدر بابا” نه دئمكدير
سعيد فيوضات

ايللر اؤنجه يازديغيم “عسگرليگيم” آدلی بير شعريمه فيكيرلشيرديم.بو شعري بير پوئما كيمي قوشدوغوم و اوزاتديغيما سبب،عسگرليگيم چاغيندا باش وئرن بير حاديثه ني،اونودولماز اولسون دئيه ،بلگه‌لنديريب و شعر واسيطه‌سي‌ايله اوخويان و دينله‌يه‌نين ،اوره‌يينده، بير حيس و دويغو ياراتماق ايدي.

حتي ايلك كره بو شعري آتاما اوخودوغومدا خسته‌ليك ياتاغيندا اولدوغونا باخماياراق ديقتله مني دينله‌ييب و اؤز فيكيرلريني سؤيله‌ييب ائله‌جه‌ده ذووق آلديغيني بللي ائتميشدي.

اوزون زامان بو شعر باشقا شعرلريم كيمي بللي ندنلره گؤره شعر دفتريمده ياتيب قالسادا، هردن بير، اؤزلليكله  ياز چاغيندا يادا شهريارين وفاتی ايل دؤنومونده بو شعري دفتريمده گزيب تاپيب و اوخويارديم. هردن ده بير دينله‌يه‌نيم اولاردي. اينديسه اوزون زامانلاردان سونرا بو شعرين ساياغي و آلينماغا گؤره ،گرك اولان هر بير ندني، يئني اؤلچولرين سيناغيندان چيخماسادا، بو شعر بير جانلي اولاي كيمي هرزامان فيكريمده ياشاييب و اؤزه‌لليكله بو سون واختلاردا ، سؤيله‌نن آنتي شهريار سؤزلرين قارشیسیندا باش قالديريب سانكي مندن يارديم گؤزله‌يير، بير داها بو حاديثه‌نين بئله دوز يازيدا(نثر) يازيلماسيني و ياييلماسيني و ان آزي دوستلارين قولاغينا يئتيشمه‌گين ايسته‌يير. اينديسه بو اولايي يازديغيم پوئمادان يارارلاناراق، قيسا اولسون دئيه، ائله دوز يازيدا، يازيب و بير داها او گؤزل خاطيره‌ني جانلانديرماق ايسته‌ييرم:

“سيمنان شهرينين هنده‌ورينده اولان بير يئرده عسگر‌ليگين ايلك تعليماتينا باشلاميشديق. اوردا كي دوستلارين يوكسك تحصيلات آلديقلاري اوچون ائله ياشلاري‌دا چوخ ايدي. اورادا منيم ان ياخين دوستلاريمدان بيريسي مازندران بؤلگه‌سیندن اولان دوغوردان‌دا گؤزل بير اوغلان ايدي. بيزيم چوخلو و بوللو دانیشیقلاریمیز اولوردو. ايكيميزين ده” تاريخه” ماراقلاندغیمیز، ساعتلارجا تاريخ حاقيندا دانيشماغيميزا سبب اولوردو و هئچ يورولمادان بو دانيشيقلار دوام ائده‌ردي. بير گون دوستوم بيردن بيره ،حيدر بابا شعري‌نين نه اولدوغونو و نه سؤيله‌ديگيني سوردو. چوخ تعجوب ائده‌رك، بو سورغونون نه‌ده‌نين سوردوم. اودا تورك ميللتي‌نين نئجه حيدر بابا شعرينه اولان هوسيندن و علاقه‌سيندن دانيشدي و دئدي منجه بوردا بير سيّر وار. من بو سيّري بيلمك ايسته‌ييرم. منيم كيفيمده هميشه حيدربابا كيتابي اولاردي. كيتابي كيفدن چيخارديب اوخويوب و فارسجا سؤيله‌مه‌گه باشلاديم. والله ائله پيس ده چئويرمه‌ديم، اوخودوم.. اوخودوم ….اودا قولاق آسدي، آما سانكي بير شئيلر چاتمير، اوزونده او گره‌ك اولان راضيليغي گؤرمه‌ديم…

بو اولايين اوستوندن بير خيلي  زامان كئچدي. بير گون يئني عسگرلرين بير اوتوبوسدا اورا گلدیکلرینی گؤردوك. بو عسگرلره، هئچ تحصيلات آلماديقلاري اوچون صيفير عسگري دئييرديلر. اوتوبوسلاردان يئره ائننده اونلارين تورکجه دانيشديقلارينی گؤروب – هاردان گلديكلريني بيلمك ايسته‌ديم. اونلارا ساري گئتمه‌يه باشلاديم. او آندا بير قيسا بوي اوغلانا راست گلديم. اوندان، هاردان گلديگيني سوردوم اما او تكجه اوزومه باخدي. هئچ بير سؤز دئمه‌دي. تعجوب عالمينده دالدالانديغيمدا، دوستو او تايدان گليب سلام وئردي

 دئدي:آي آغا بيزي زنجان كندلريندن گتيريبلر. بو اوغلان بير چوباندير. هئچ زامان دا دانيشماييب و هميشه سوسقوندور.

نه‌دن سوسقون اولدوغونو سوردوغومدا ،بير آز منه باخيب سؤيله‌دي بو اوغلانين كؤكسونده، اوره‌يي يوخدور. اينانميرسان؟

من ده اينانماديغيمي سؤيله‌ديم. منی بو حالتده گؤرن اوغلان ائله او آن دوستونون ياخاسيندان ياپيشيب و دويمه لرين آچيب او اوغلانين كؤكسونو منه گؤستردي.

سانكي يومروق ووروب كوكسونو باتيرميشديلار. نورمالدا اوره‌يين يئرلشن يئرينده بير يومروق قدر يئر ايچه‌ريه باتيب سانكي بير دره يارانميشدي.

بو احوالاتي گؤرن كيمي قولوندان ياپيشيب اونو ساغليق ائوينه (بهداشت ائوي) آپارديم.

ساغليق ائوينده كي دوقتورلار اونون دورومون گؤرن كيمي دورومونون تهلوكه‌لي اولدوغونو سؤيله‌ييب و چوخ فعاليت ائتمه‌گيني ضررلي گؤردولر.

ائرته‌سي گون يئني گلن عسگرلري يئنه اوتوبوسلارا مينديريب و اورادان باشقا يئره آپارديلار، آما او اوغلاني گؤتورمه‌ديلر و اونون گئري قاييتماسي و ديقتله دوقتورلار طرفيندن معاينه اولماغي‌نين گرکلیگینی سؤيله ديلر. ائله اونا گؤره ده او گئجه‌ني بيزيم ياتاق خانايا بير قوناق كيمي گؤندرديلر.

آخشام  چاغي اولدو. اوتوروب و چاي ايچيرديك. خسته اوغلان دا بيزه باخيردي. سانكي گؤزلري اوجسوز-بوجاقسيز قارانليقا آچيلان بير باجا ايدي. هؤروكلنن كؤكسونون خيسيلتيسيندان سونرا هئچ بير سس گلميردي. ايچينده كي دونيادان باش آچماغا هئچ بير كئچيد گؤرونمه‌ييب کؤرپوسوز بير چايين قارشي طرفين سرگيله‌ييردي. قاشلارينين آچيلمايان دوگونوندن بئله غير عادي بير دورومدا اولدوغونو سئزمك اولوردو. اونو ديله گتيرمك اوچون گؤردوگوموز هر بير ايش،بوشا گئديب و چاره‌سيز بير حالدا اولدوغوموزو گؤردوك. نه قده‌ر اونو دانيشديرماغا چاليشساقدا بير او قده‌ر سوسوردو.

بيردن ايلديريم كيمي بير دوشونجه بئينيمه چاخدي. آياغا دوروب چانتاما ساري گئتديم. ال آتيب و هميشه يول يولداشيم اولان حيدر بابا كيتابينی اله آلديم. اؤز يئريمه قاييداندا دوستوم منه گولومسه‌دي. اوزونو منه ساری دوتوب دئدي: بو يازيق هئچ دانيشيغي باشا دوشمور، سن بو ساوادسيزا شعر اوخوماق ايسته‌ييرسن؟

نه بوش – بوش ايشلر دير كي سن گؤرورسن؟

بئينيمده بير توفان قوپدو. اگر شهريارين آناسي بو شعرين واسيطه‌سيله شهريارين شاعير اولدوغونو باشا دوشوبسه و اونلاري منيمسه‌ييبسه اوندا “لالين ديلين آناسي بيلر “سؤزونو بير داها بوردا يوخلامالييام.

خسته اوغلانين قارشيسيندا اوتوروب كيتابين قاتينی آچديم. شهريار دانيشماغا باشلادي:

حيدر بابا ايلديريملار شاخاندا

سئللر سولار شاققيلداييب آخاندا

قيزلار اونا صف باغلاييب باخاندا

سلام اولسون شوكتيزه ائليزه

منيم ده بير آديم گلسين ديليزه………..

هر بئشليگي اوخودوقجا گؤز آلتي باخيرديم. خسته اوغلانين اوزونده گؤرونتولرين دييشيلمه‌سينی گؤروردوم. بير باهار گونونده قارا بولودلارين گئري‌یه چكيلمه‌سي و گونشين گولومسه‌مه‌سي كيمي گورونتولري گؤرمه‌گه باشلاديم.

قاشلاري نين دوگونلري آچيلماغا باشلادي. بير توفانلي اوره‌يين دالغالاري سايخينليغا دؤنمه‌يه باشلادي و دوم – دورو بير سويا چئوريلدي. سؤزلر آغيزدان چيخاركن قولاقلارا يئتيشيب اوره‌يه آخان بير گور بولاغين سسي، شعرين موسيقي‌سيله، قاريشيب بير سیمفوني ياراتماغا باشلادي

خسته اوره‌يي بير ساغلام اوره‌يين دويغولارينی ياشاتماق ايدعاسينا باشلاميشدي. بير ياز بولودوندان دوشن گورشادا بنزر گؤز ياشلارينی گؤردوم. سوزولوب ياناغيندان بئله كؤكسونده كي چوخورا دولوردو.

مازندرانلي دوستوم بو منظره‌يه لاپ مات قالميشدي.

نهايت اوره‌ك داوام وئرنمه‌دي. خسته اوغلانين قوللاري اوزانيب، كيتابي اليمدن قاپيب،گئري‌يه  چكيليركن كيتابي اوره‌يي‌نين باشينا باسدي، اوره يي‌نين آتشينه باسدي، كيپريكلري ياشلار ايچينده بوغولدو و گؤزلرينه دولان ياشلارين يئري داریسقال اولاندا گؤزونون گوشه‌سيندن كيتابين جيلدينه داملا-داملا دامجيلادي. آغزي آچيليب دانيشاندا قولاقلاريما اينانماديم. هئچ دانيشمايان بير خسته، پاسلانميش سس تئللريندن چيخان سسيله، ايلك كره اولاراق دانيشاركن، دويغولارينی ايفاده ائتدي. منه باخيب دئدي:بو كيتاب منيم اولسون

دئديم:ياخشي بو كيتاب سنین اولسون، آما سن منه سؤيله گؤروم بو كيتابين اوخوماغينی باجاريرسانمي؟

يوخ دئدي…

دئديم اوندا سن منه ايجازه وئر بو كيتابي سونونا قده‌ر سنه  اوخويوم.

ائله اودا اوخوماغيمي ايسته‌دي.

شهريار دانيشيب قورتاراندان سونرا، خسته اوغلان اؤزو- اؤزوندن دانيشماغي اؤيرندي؛ ديله گلدي،باشينا گلن ايشلردن دئدي،كندلريندن دانيشدي،گؤز_ گؤزو گؤرمه‌ين بورانلاردان، باغلي يوللاردان……..دانيشدي و دانيشدي و سونوندا كيتابي قوجاغلاياركن شيرين- شيرين بير يوخويا دالدی.

مازندرانلي دوستوما باخديم، آغيزي آچیلا قاليب بير اونا باخيردي بير ده منه.

اوتقونوب دئدي: ايندي بيلديم حيدربابا نه‌دير….ايندي بيلديم شهريار كيمدير…

22/8/91

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *