اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
قوجا بیلی ناغیلی
چئویرن: سعید فیوضات
ترجمه: سعید فیوضات
سعید فیوضات
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

 آلاچیق، گؤزل گؤرکمی ایله سانکی باش قالدیریب اللرین قوینونا آلارکن داغلارا باخیب، گؤیلره سورتوشونده، قالانمیش اودون رقصه گلن قیغیلجیملاری، سانکی آتش، اویون هاواسی چالديرير دئیه، تره‌کمه‌یه باشلامیشدی. قوجا کیشی، موسی دوستومون قوهوملاریندان بیریسی و قوجا بیلی (qoca bəyli)ائليندن ایدی.

ایلین بو گؤزل واختيندا گلیب یایلاقلاری گزمه‌ییمیزی و دولاشماغیمیزی، خوش‌گلدین دئیه‌رک، گؤزل قارشیلامیشدی و ایندی آخشام چاغی اودون قاباغیندا، قیزیل قان رنگینی یامسیدان دملنمیش چايلارین اینجه بئل ایستکان لارا سوزولمه‌سینه بیرگه باخیردیق. گؤزل سؤزلر گئدیردی. سؤزلر ایندیلیکدن باشلاییب کئچمیشلره و حتی اسکیلره اوزانیب یاشلی کیشی‌نین دیلیندن آچدیم صاندیغی توکدوم پانبیغی سؤزونو ائشیتمه‌مه‌یه قدَر داوام ائتدی. ساوالان  اته‌یی‌نین  یایلاقلاریندا سو جوشان کیمی سؤز جوشور. چوخ زامانلار آدین ائشیدن کیمی منی باشقا دونیالارا گؤتورن “آت گؤلو”نون آدی خیالیمدا دینج قالماییب و هئی بینیمده جانلاناراق آغزیمدان چیخماق ایسته‌ییردی و سونوندا بو آدی سؤیله‌دیم و قولاقلاریم بو تلَسگن و بیر یئرده قالمایان سؤزو  ائشیتدی . بو سؤزو سؤیله‌ین کیمی اودون بیر آنلیق دورماسینا و حتی سسیمین اوجالیب داغلاردان – داشلاردان بئله    ترس صداسي گلمه‌سینه اینانان کیمی اولدوم. اوشاقلیق چاغلاریندا گئجه‌لر گؤردویوم او قیرمیزی مینجیقلار کیمی.

یاشلی کیشی بو سؤزو ائشیدن کیمی هر سورغونون جوابین بیلن بیر بیلیجی  معليمه تای درین بیر نفس آلیب گؤزلری پارلادی.

-سنجه اوجا داغلار باشیندا بیر گؤلون آدی نه‌دن آت گؤلو اولا بیلر؟

-منجه بو بیر حيکایه‌دن قایناقلانا بیلر.

-سنجه حيکایه‌لر دوغرودور مو؟

-منجه دَییشیلیب باشقا واریانتلارا دؤنسه ده نه‌دن‌سیز بیر حيکایه اولابیلمز.

یاشلی کیشی سویله‌دی: “آتام یوز اییرمیني یاشامیشدی آتاسی دا ائله جه ، منیم ایسه سکسن بلکه ده دوخسان یاشیم اولا اولمایا. یایين اورتا آیلاریندا بیر گئجه وار، یوز ایللرجه بوندان قاباق آدلیم اولان بیر گئجه. او بیر گئجه ده منیم آتا – بابالاریم بو گؤلون هنده‌ورینه گلیب قلبی(بیر آز هوندور) بیر یئرده دورارمیشلار. گئجه یارینی اؤتنده اوزاقلاردان چاپاغان بیر آتین کیشنه‌مه سسی گلرمیش، گئتدیکجه بو سس اوجالیب و گولوو اؤتن  بیر آتین چاپماق سسی  گلیب، اؤزو گؤرونمه‌دن فینخیریب کیشنه‌ییب دیرناقلاري‌یلا یئری ائشیب سویو لپه‌لندیریب، چاپارکن اوزاقلاشارمیش. بو آتا، گئجه‌نین قارانلیغی کیمی گؤزه گؤرونمه‌دیینه گؤره “قارا” دئیرمیشلر. بیر آسلان و باهادير ساواشچی‌‌نین آتی ایمیش. قنیملر او باهاديري توتوب آما آتینی توتا بیلمه‌میشلر. آت او قنیملرین قوماراسیندان قاچاراق داغلاردان داشلاردان کئچیب بو گؤله یئتیشر و اؤزونو  قنيم‌لرین قوماراسیندا گؤرن کیمی اؤزونو گؤله تاپشیریب، سولارین ایچینده گؤزدن ایتر………

بو قدَر آغیر و اینانیلماز سؤزلری ائشیدن کیمی سانکی یوخو گؤرورم سسلندیم:

-او باهاديرين آدی نه ایمیش؟

یاشلی کیشی گولومسه‌دی:

-یئنی‌یئتمه‌لر اونا بابک  دئیيرلر ….

 یای1391

اشتراک گذاری در print
چاپ

یک پاسخ

  1. من شاهسون و قوجابیلی الیندنم. بو هیکایه بو شکیلده بیز دییلیب. آما او آت آق آپپاق سؤت کیمین و اؤزؤده خیزیر پیغمبر ین آتی ایمیش دیه بیلدیریبلر.

    ساولاندا ایکی مقدس حیواندان سؤز اولور ، ایکیسیده گؤزه گؤرؤنمه ین. کیشنین سؤت آق بیر آت و بوزلویان سؤت آق بیر مایا .
    (بوزلاماق = دوغماق واقتیندا حیوانلار دان چیخان سس، مایا = بیر نوو دیشی دوه))

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سعید فیوضات

سعید فیوضات

باشقا اثرلری