چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده

آللاه اؤلنلریزه رحمت ائله‌سین، آنام ائله پیشیک دوواردان ایری گئچنده منی قارقیش ائله‌یردی. بیلمیرم، بلکی ده اوندا اوشاغیدیم. پیشیک ایله، آصلان آراسیندا فرقی آنلامازدیم. هر حالدا ائله کی بؤیودوم و ائولنیب اوشاق صاحابی اولدوم، آنلادیم کی اوشاقلار آتا آنالارینین باشینا تاس دگیرمانی چئویرنده، دووار باشینا گؤندردیکلری او جاناوار، اصلینده پیشیک یوخ، ائشگکدن ده بویوک بیر اصلاندیر.
سنی گؤورم بالا قان قوسمایاسان
سنی گؤروم ماشین آلتیندا قالمایاسان
سنی گؤروم بالا اریییب، یئره گیره‌سن
و و و…..
ایشین ایلگینج یانی دا بیلیرسیز نه دیر؟ بونلارین چوخو تام تامینا باشیما گلمه‌سه ده، گئنه زامان گئچدیکجه بنزر بیر شکیلده هامیسینی بیر- بیر یاشادیم.
بلی سئوگیلی یولداشلار! آنا قارقیشیندان قاچماق مومکون دئییل. کسین بیر گون گلیب، ایلدیرم کیمی سنی یاخالار.
دوزدور کی حیاتیمدا من هئچ قان قوسمادیم، آمما نادانلیقدان قوسماغین دیگر چئشیدلرینه ایلیشدیم. اؤزللیکله گنج چاغلاریندا کی حددیمدن، اندازه مدن خبریم یوخودو. یقین کی نه دئدیگیمی آنلامیشسیز. جاوانلیق جاهیللیق ایشده…
ماشین آلتیندا قالمادیم، آمما ماشیندان داها بترینه راست گلدیم. باخین سیزه بیر نصیحت!
منجه اینسان گئدیب دووار قیراغیندا اوتوروب دیلنچیلیک ائله‌سین، حتتا آجیندان اولسون، آمما بانکالاردان بورج آلماسین. ماشین آلتیندا قالیب، بیرآن جان وئرمک، بورج آلتیندا یاواش یاواش اؤلمکدن و نه کی وارینین هولا قوشولماسینا شاهید اولماقدان داها دا یاخشیدی منجه.
نه ایسه کی گؤز یاشی، بورون پوخو و البت ده خانیمین قیزیللاری، بیزی بانکانین او اون سککیز تکرلی بورجو آلتیندان ائشیگه چیخارتدی.
بیر خاطیره ده تعریف‌لییب، بو آنا قارقیشی قونوسونو قاپاتیم.
گونلرین بیر گونونده ایش ایچین سفره چیخدیم. بلی ایش ایچین!
بو «ایش ایچین» سؤزو ائله خوشوما گئدیر کی. بو اوزدن ده اونو هئی تیکرارلاییب، دورورام.
تک باشینا ائودن ووروسان ائشیگه. بیر هفته، ایکی هفته. راحات بیر نفس آلیرسان. اوشاقلاری دا وئریرسن آنالارینین قولتوغو آلتینا. آرتیق دا اومروندا دئییل، دووار باشیندان پیشیک گئچیر، یا دا آصلان.
خولاصه او بئش- اون گونو ائودن اوزاقدا، قافایی دینجلدیب ائوه دؤندوم. دؤنوشده ده ائو اهالیسینه هدیه‌لر آلدیم.
کیچیک اوغلوم اویناتمالی تابانجاسینی قوتوسوندان چیخاردیب، الینه آلدی. موتلولوغا دوغرو قاچیب، تئروریست سالدیریلارینا باشلادی.
بالاجا قیزیم، پمبه رنکده دؤنونو گؤورنجه، آتیلیب توشدو. پیشک کیمی دوورلارا دیرماندی. یااا..آللاهیم یا رببیم! قریبه ایشه قالدیق هاااا.. بو گون بو پیشیک بیزیم حئکایه‌میزه گیریب، چیخماق بیلمه‌دی.
خانیمیما گلینجه، اونا گؤزل و باهالی بیر شالوار آلمیشدیم. آمما..
آمما شالواری اینینه گئیدیگینده، گؤردوم هم خانیمین قاش قاباغی یئرده گئدیر، هم ده شالوارین پاچالاری.
بلی، شالوارین هر قیچی تخمینن ایکی قاریش اوزونودو. یازیق جیغاز، قئیچی، ایینه، ساپی الینه آلدی. باشلادی یاواش یاواش تازا آلدیغیم شالواری قیساتمایا.
«بئله کی سن باشلامیسان، یئددی گئجه یئددی گوندوز سورر سنین بو تعمیر ایشین.» اونا دئدیم.
آستا اولدوغونو تپه سینه ووردوم. هر شئیی الیندن آلیب، اؤزوم ایشه باشلادیم. تئز اؤلچدوم بیچدیم، شالوارین بیر قیچینی کسدیم. کسه کسه ده قورورلا، درزیلیکده نئجه ماهیر اولدوغومو و چوخ آز موددت ایچینده بو ایشی بی بی اوغلومدان اؤیرندیگیمی دئییردیم. سونرا او بیری قیچی دا قیساتدیم. پاچالارینی قاتلاییب، تیکمه دن اوول، دئدیم شالواری اینینه گئیسین و منیم ایکی ثانیه ایچینده بو ایشی بیتیرمه‌گیمه حئیران قالسین. هه! قالدی دا آمما..
آخی سیز آللاه! منه دئیین گؤروم، مگر آدام بوزدو کی اریسین. هله بیر ده یئره گیرسین. توتالیم کی اریدی، هاردان بللی کی یئره گیره جک. نه بیلرسن؟ بلکی ده آسفالت اوستونده اریمیش اولدو. اوندا هانکی یئره گیره بیلر کی.
هه، شالوارا نه اولدو؟
بابام! بوش وئرین شالواری. هئچ بیر شئی اولمادی.
دئییرم آخی رحمتلیک! بو نه قارقیشیدی ائله‌دین. ایندی من، بو یئکه‌لیکده کیشی نئجه اریییم آخی. اریدیم بئله هارا گیریم.
شالوارا نه اولدو؟
بابام! حئکایه ده کی پیشیک بیر یاندان، سیز ده او بیری باندان. ال چکین گؤرک باشیمدان.
هئچ ذاد. شالوارین بیر قیچی، اوول کی کیمی، هله ده ایکی مئتیر یئرده سورونوردو. او بیری قیچی خانیمین دیزینه قدر قیسالمیشدی.
یانی…
یانی کی بیر قیچی ایکی دفعه کسمیشدیم.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سنی گؤروم اریییب، یئره گیره‌سن

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

سنی گؤروم اریییب، یئره گیره‌سن

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

سنی گؤروم اریییب، یئره گیره‌سن

محمد احمدی‌زاده
www.ishiq.net

آذربایجان ادبیات و اینجه‌صنعت سایتی