دؤیونه‌جکدیر اوره‌کلر کیمی
ع. ن. “چاپار “
اللریمیزی اوزالداجاغیق
گؤیلردن اولدوزلاری ده‌رک .
سوندا ،
سینه‌میزه تاخاجاغیق اولدوزلاری.
اوره‌ک– اوره‌ک دؤیونه‌جه‌ییک
و سئوینه‌جه‌ییک –
اولدوزلاری سینه‌لرده ،
سایریشان گؤره‌نده !.
صاباح،
بیزیم ایشیمیز-
اولدوزلاری گؤیلردن ده‌رمک اولاجاق.
بیز بوتون صاباحکی‌لاردا –
صاباحکی‌لارین سینه‌لرینده
تاخاجاغیق بیر به بیر
سایریشان اولدوزلاری؛
و –
هامی اوره‌کلر دؤیونه‌جک،
و –
سئوینه جک-
سایریشان اولدوزلاری سینه‌لرده گؤره‌ن آندا.
داها هئچ کسین اولدوزو
گؤیلرده‌ن آخمایاجاق.
و – او ،
سینه‌لرده دؤیونه‌جکدیر،
دؤیونه‌جکدیر اوره‌کلر کیمی!…
