کؤلگه‌لر
ع. ن. چاپار
هر سحر،
گونش چیرتلاناندا
سمانین بیر بوجاغیندان
بیزیم شه‌هرده ده
هر قاپیدان بیر نئچه
کؤلگه چیرتلانیر چؤله.
کؤلگه‌لر
بویاندان – اویانا سوزولور آستاجا ..
کؤلگه‌لر بیر – بیریندن آخیر،
کؤلگه‌لر بیر – بیریندن سوزور.
کؤلگه‌لر اینجیمیر
کؤلگه‌لر آغریمیر،
ساکیت – ساکیت
خیمیر – خیمیر
هر سحری آخشاملاییر،
هر آخشامی گئجه‌له‌ییر..
و، هر سحر یئنی‌دن –
چیرتلاییر چؤله.
بو کؤلگه‌لر هاردان آخی؟!
و کؤلگه‌لر نه‌دن بئله ؟!…
