کوچه‌لر
ع.ن. چاپار
آرخادان
داشا باسیلا – باسیلا –
دیپ‌لری باغلی کوچه‌لرده قووولدوق .
دیوارلاری داشدان هؤرولموش ائولر ؛
بینالاری قیسا ،
قاپیلاری رزه‌سیز-
قاپالی کوچه‌لر !…
گؤلمه‌چه‌لرده
قیژغیرمیش سولاردا بوغولان بالیق‌لار تک
نفه‌سیمیز تنگه دوشموش .
آرخادان آتیلان ،
داشلارا باسیلاراق –
بوغولوروق یامان …
قیسالیریق بینالار تک،
هؤرولوروک داش کیمی دیوارلاردا .
قاپیلیریق رزه‌سیز ،
قاپالی قاپیلی کوچه‌لرده ؛
اؤلوروک اینله‌مه‌دن .
إه …
بو کوچه‌لردن ..
بو کوچه‌لردن!…
