سوغات آپارماغا اؤز بخت ائوینه
محبت بزه‌کلی اوره‌یین اولسون!
آنالیق یولونا قدم قویان قیز
بو یولدا محبت کؤمه‌یین اولسون!
یادیندان چیخارما بیرآن عصمتی،
عصمت‌دیر قیزلارین عؤمور زینتی؛
وطن سعادتی، ائل سعادتی
هر زامان مقدس دیله‌یین اولسون!
-«گئیینیب، بزه‌نمه!» سؤیله‌میرم من،
باجارسان هم گئیین، هم ده کی بزه‌ن!
آمما ایسته‌سن کی گؤزلله‌شه‌سن
وفا، عصمت، ووقار بزه‌یین اولسون!
حیاتدا باش اگمه درده، موشگوله،
کدرلی سؤزلری گتیرمه دیله،
باغلا طالعینی وطنه، ائله
خالقین خوشبختلیگی دیله‌یین اولسون!
اینسانلیق عشقی‌له یاشا هوس‌له،
قارانلیق گئجه‌ده گونشی سسله،
زامانا سس وئرن اوغول، قیز بسله
قوی بارلی بهرلی امه‌یین اولسون!
گؤزلری یولدادیر گلن نسیلین،
بو آنا تورپاغین، بو دوغما ائلین-
گؤزلر عنعنه‌سین و گؤزل دیلین
قورویوب ساخلاماق گره‌یین اولسون!
۱۳۶۴ – تبریز
