۱- یاشیل آرزی
قیشین سویوق نفسی
هوپدو مئشه‌نین جانینا؛
سازاغین بوز نغمه‌سی ایله
تیتره‌شدی جویورلر.
دوندو سولارین سسی،
قوشلارین نغمه سی.
دوندو آغاجلارین داماریندا قان،
دوندو مئشه‌ده هر زاد؛
دونمادی آنجاق حیات.
مئشه‌نین کؤکسونده دؤیوندو اوره‌ک
یام- یاشیل آرزی‌لارلا…
۲- یاشاماق
قارانلیق، گؤز ایشله دیکجه
یوخ..!
گؤز ایشله‌یرمی قارانلیقدا؟!
گؤز، ایشله‌مه‌نی
من ایسه گونشی
اونوتموشلاریق قارانلیغین درینلییینده،
اوزون گئجه‌نین بویوندا.
بیر ایچیملیک ایشیق
ساچدی قلبیمه؛
ساچدی
ظولمتین چوروک قاپیسی‌نین دئشیییندن.
گؤز، ایشله‌مه‌نی اؤیرندی یئنی‌دن
من ایسه تامسیندیم گونشی.
گؤزلریمده لپه‌لندی ایشیق
اوره‌ییمده صاباح
بیر ده یاشاماق.
