طریق عشقده باخسان ایزیم قالیر هله ده،
بو یولدا تیتره‌مه‌ین بیر دیزیم قالیر هله ده.
عاغیل دئیرکی وصالین محال‌دیر، هئیهات!!
اوره‌ک دئیرکی یولوندا گؤزوم قالیر هله ده.
نه غم قوورسا منی شاختاسی‌لا بو قارا قیش،
باهار ائلچیسی بیر نرگیزیم قالیر هله ده.
یازیلمامیش شعیریم وار سنه نئچه دفتر،
دئییلمه‌میش اوره‌ییمده سؤزوم قالیر هله ده.
سنین غمینده ایلیشدیم، عؤمور بویو قالدیم،
آراز غمینده نئجه تبریزیم قالیر هله ده.
اوره‌ک جواندیر، اؤزوم ظاهرا قوجالسام دا،
باخین غزل‌لریمه داد-دوزوم قالیر هله ده.
بیر عؤمر آیریلیغا دؤزموشم یئنه دؤزه‌رم،
«هریزلی»ده اوجا داغ تک دؤزوم قالیر هله ده.
هریس ۱۴۰۲/۱۱/۰۸