صنعت سماسیندان آخاندا «اولکر»
چؤکدو سیس دومان تک هر طرفه غم.
یاییلدی ائل ایچره بو غملی خبر
باشا – باش بورودو اؤلکه‌نی ماتم؛
زیلده کمانچالار، سیزلار آغلادی
قوربت هاواسی‌یلا سازلار آغلادی.
اوفوقلره ساری توتغون بیر سحر
قیزیل شفقلرله آل بویانارکن
ماتمه باتدیلار کند، اوبا، شه‌هر
سانکی آغلاییردی بو آنا وطن؛
کؤکسومده قوور ائدن کؤزلر آغلادی
قوربت هاواسی‌یلا سازلار آغلادی.
دنیزلرین آهی دؤندو دومانا
«سهند»ین، «ساپلاغ»ین باشینا چؤکدو،
دؤندو «ساوالان»ین اوره‌یی قانا
شلاله سئل کیمی گؤز یاشین تؤکدو؛
دره‌لر آغلادی، دوزلر آغلادی
قوربت هاواسی‌یلا سازلار آغلادی.
آنامیز وطن ده سینه داغلادی
او سحر کی اولکر سمادا سؤندو،
قونچا قه‌هرلندی، گول‌لر آغلادی
چای‌لارین نغمه‌سی ناله‌یه دؤندو؛
سونالار اوخشادی، قازلار آغلادی
قوربت هاواسی‌یلا سازلار آغلادی.
یاز بولودو کیمی گؤزلریم دولدو
کدر عمّانیندا غرق اولدو گمیم،
شئهلری اوستونده گول‌لر ده سولدو
منیم ده باشلاندی قارا ماتمیم؛
اوره‌ییم چاغلادی، گؤزلر آغلادی
قوربت هاواسی‌یلا سازلار آغلادی.
کاغاذا ناله‌می یازماق ایسته‌دیم
سانکی کلمه‌لر ده یاسلی اولدولار،
اوره‌ک سؤزلریمی شعریمله دئدیم
کاغاذ دا، قلم ده درده دولدولار؛
قلم ناله چکدی، سؤزلر آغلادی
قوربت هاواسی‌یلا سازلار آغلادی.
آذر ۱۳۶۴- تبریز
