سانکی ترسینه فیرلانیر،
دونیا کیمین الینده‌دیر؟!
یئرکوره‌سی اوددا یانیر،
دونیا کیمین الینده‌دیر؟!
بیر یان آجلیق، بیریان توخلوق،
بیر یان وارلیق، بیریان یوخلوق،
نه‌دیرمی بو سوخاسوخلوق؟
دونیا کیمین الینده‌دیر؟!
بیری چاپار، بیری تالار،
بیریسی چیلپاق، آج قالار،
انسان، انسان قانی یالار،
دونیا کیمین الینده‌دیر؟!
بئله دونیا نه‌یه گره‌ک؟
آچان گولله، سولان چیچک.
حاکیم نه عاغیل، نه اوره‌ک،
دونیا کیمین الینده‌دیر؟!
نه انصاف وار، نه عدالت،
نه سئوگی وار، نه محبت،
حددن آشیبدیر جنایت،
دونیا کیمین الینده‌دیر؟!
اؤلور سوچسوز اوشاق، قادین،
کیمسه دینله‌میر فریادین،
گونو دوغوبدور جللادین،
دونیا کیمین الینده‌دیر؟!
اؤلدورمک، اؤلمک ده پئشه،
تانری مات قالیب بو ایشه،
حئیران باخیر بو گردیشه،
دونیا کیمین الینده‌دیر؟!
۱۷/۸/۱۴۰۲ – هریس
