حسرتین شکلینی چکنده بیر گون
آناسیز کؤرپه‌نی بئشییینده گؤر!
ایسته‌سن داداسان آجیلیقلاری
کؤلگه‌سیز انسانی ائشییینده گؤر!
کؤوره‌لیب انسانلار، دویغولار کوسوب،
کؤچوبدور زامان دا یانلیز قالمیشیق.
گوندوزو آخشاما یالاندان تیکیب
یاشاییش بوینونا قادا سالمیشیق.
گون به گون اوجالیر حسرت دوواری
کرپیچلر قیناییر یازیق انسانی.
قوجالیر وجدانلار، قوجالیر آه‌لار
جالانیر هر زامان دویغونون قانی.
بو رسمی دئییلدی تقدیره اویاق
شاختالی سؤزلره باش اییب دوناق
قورخودان آسلاناق یالان دونیایا
قیسالاق، هئی یاناق، اوجوز آللاناق.
اینانجی چکمه‌گه رسام تلسمیر
بؤیله‌سی دوروما اینانمالی‌ییق
آیدینجا باخماغا نه‌لر گرکیر
هله «شاهید» دایان دایانمالی‌ییق.
تلسمه گله‌جک یاخشی باخیشلار
سونوندا بیته‌جک حسرتین آدی
مینینجی یاشاییش، بیرینجی چاتیش
توکنمز او زامان گؤروشون دادی.
