من دلی، دیدرگین، هم ده یارالی
هر فصیل گولله‌لر باغرینا باسدی
چیلپکلی عصیرین قوخونتوسوندان
بیر اوغلان اؤزونو قویودا آسدی
آجیخیب گؤزلرده وارلیغیمیزدان
دیسکینیر، گئجه‌لر گومانلاریمیز
آستاجا توخویور قورخونج ایپلرین
بیر به بیر دونورو دومانلاریمیز
پلمه‌لی گونلره هؤرولموشوک بیز
ایللردی گیزله‌نیب آرزولاریمیز
آللاه دا اوتانیر داها بیزلردن
حسرته دؤنوبدور تام آرزولاریمیز
اؤزومو اؤزومدن قووالاییرام
قیسیلیر دیشلریم، دولاشیر دیلیم
باخیشیم مئییت تک قورویور قالیر
بؤلونور سوکوتوم دیلیم به دیلیم
قوجالدیق افندی بوراخ یاخانی
سمیرسیز گونلردن یورغونلاشمیشیق
ماتیشکا اولموشوق اوشاقلارا بیز
ویترینین اؤنونده قالیب دونموشوق
سیاهلی بیر پرده گؤزون اؤنونده
غمه چولقالانیب سئگاه‌لاریمیز
بئله سانیبلار کی گون بو گوندو هااااا
دایان، توتاجاقدیر بو آه‌لاریمیز
