شاعر ائلین گوزگوسودور
سؤزلرینده ائل گؤرونر.
آنالارین یادگاری
شیرین-شیرین دیل گؤرونر.
شاعرلرین یازیسیندا بولاق، چمن، گول گؤرونر
«فلامینگو»، آرتمیا»لی گؤل گؤرونر،
تام معنادا ائل گؤرونر.
شاعرلرین ترنّمی
ائل سسی‌نین دوغرو عکس صداسی‌دیر،
آتالارین اؤیودودور،
آنالارین لایلاسی‌دیر، دوعاسى‌دیر؛
سوسدورولسا شاعر سسی
اوجالاجاق ائل نعره‌سی.
شاعرلرین روحو اینجه، قلبی کؤوره‌ک،
سینه‌سینده دؤین اوره‌ک
دولو آرزو – دیلک اولور.
ائل دردی‌دیر، ائل غمی‌دیر شاعر دردی، شاعر غمی؛
او اوره‌یه توخونسانیز
بیلرسیزمی گؤزللیکلرکوسر سیزدن؟!
یاغیش یاغماز
تورپاق دوغماز
طبیعتین قهری دوغار
شر دیرچه‌لر،خئیری بوغار.
قورویار چای‌لار، بولاقلار
بلکه ده دؤنر واراق‌لار
سوسدورولسا بو دوداق‌لار.
شاعرلره توخانمایین
قویون سربست اؤتسون قوش‌لار،
گؤزللییه وورولموشلار!
اؤزللیکله
شاعرآنا، شاعرقادین
هرکیمسه‌دن آرتیق بیلر سئوگی دادین.
اونلاریاخشی باجارارلار قوروسونلار
اوباسین، ائلین، ائولادین.
