بو ایل قیشی
قاری ننه
کورسو اوسته اوتورداجاق جئیرانینی،
بیر توووندا
موشتلویونه قویا – قویا پاپروسونو
گؤزلریله
بیر هارایا اویار – باخار
«زینب پاشا» ناغیلینی دئیه‌جکدیر قیزلارینا.
هر توووندا
یان با یانا
شکله‌یه‌رک قولاغینی نتیجه‌لر، کؤتوجه‌لر
اؤزلرینی رؤیالاردا
«زینب پاشا» گؤره‌جک‌لر،
دان‌یئری‌نین آمال یوکلو یوللاریندا
شفق‌لره بویلاناراق
گله‌جه‌یین سرحدینی هؤره‌جک‌لر.
اورا بیزیم
هؤرمه ساچلی گؤزه‌ل وطن،
اؤیونوروک اونونلا بیز.
اورا بیزیم
گونش اوزلو سئوگیلیمیز.
۱۴۰۱/۰۷/۲۴ – ماهدشت
