قاپی– قاپی دیله‌نه‌جه‌ییک؛
قاپی – قاپی.
هر قاپی‌دان بیر سامان تئلی پای اولاجاق بیزه؛
اومموشوق بلکم،
قورخو دوشوب گؤزوموزه؟!

دامجی – دامجی سو ییغاجاغیق
بیر آووچ قده‌ر؛
بیر چیمدیک قده‌ر ده تورپاق؛
قاتاجاغیق…،
آچیلاجاق طیلیسیم بئله قاتیقدان!

ایچدیییمیزدن سونرا
– قارا معجونو –
جنون جینایتله تن اولاجاقدیر،
بوغازیمیزدا یئنه تیخینیب قالاجاقدیر
سونداکی طیلیسیم
ایچیمیزده قانا – قان ائده‌جکدیر!

قاپی‌لاری چالیرام؛
قاپی‌لارین رزه‌سینی چالیرام،
حالقاسینی چالیرام،
زنگینی چالیرام.
– داش قاپی
تاختا قاپی
دمیر قاپی- ؛
هامیسی بیردن آچیلیر،
هامیسیندان بیر سس چیخیر،
ایستی جانلی نفس چیخیر.
هامیسینین اؤنونده دایانیرام،
ایچلرینده گزیر گؤزوم؛
آختاراجاغام
لاپ دیلنچی تک اولسادا
ایتمیش رؤیالاریمین
آغ دونلو گلینین!

کیمدیر باغلایان او قاپی‌لاری؟!
کیمدیر اویدوران او رزه‌لری؟!.
کیم‌دیر حالقالاری حالقاجیندان قوپاران
و، زنگ‌لری یئرلریندن سؤکدورن؟!.
کیم‌دیر او؟!..

قاپی‌لارین آرخاسیندان
بوتون دیلنچی‌لره
خئیر – دوعالار سسله‌نیر،
قاپی‌لار هوسله‌نیر…!