«ایتیک چتین اولار» بابالار دئمیش،
من ایسه آلتمیش دؤرد ایل ایتیرمیشم.
نه کی آرزوم، رؤیام یانیب کول اولموش،
کولونو آپاریب یئل، ایتیرمیشم.

قوراقلیق ایللره کیم سالدی بیزی؟!
ایتیردیک باهاری، یایی، پاییزی؛
قوروتدو یاد الی چای-چشمه‌میزی،
دره‌لر دولوسو سئل ایتیرمیشم.

بیر عؤمور یاشادیم غریبلر کیمی
کیمسه آنلامادی منیم دردیمی؛
من ایتیردیییمی کیم ایتیریب‌می؟!
وطن ایتیرمیشم، ائل ایتیرمیشم.

سئچیلمیر قیشیمدان ایلک باهاریم دا،
مندن اوز دؤنده‌ریب آرزولاریم دا،
کوسوب، یادیرغاییب دویغولاریم دا،
آنام امانتی دیل ایتیرمیشم.

تک اونا باغلیدیر بوتون حیاتیم،
او ایتسه چاپیلار قولوم، قانادیم؛
دئدیلر، «هریزلی»! من اینانمادیم
اورمودا بیر دوزلو گؤل ایتیرمیشم.
۳/۵/۱۴۰۱