منیم نازلی، دوزلو گؤلوم
شیرین دیللی سازلی گؤلوم، سؤزلو گؤلوم،
دوداقلاری سوسوزوندان بؤلوم- بؤلوم
سنی تانری آچ گؤزونو
اورمو گؤلوم!
الی سنه چاتانمایان
اوره‌یی قان خزریمین قارداشی‌سان؛
باختی قارا
زاواللی بیر ائل- اوبانین گؤز یاشی‌سان؛
بو تورپاغین خزینه‌سی
ان ده‌یرلی داش- قاشی‌سان.
قیمتینی بیلنمه‌دیم
منه اؤلوم، منه اؤلوم
اورمو گؤلوم!
عؤمور سوردوم
{شاعر عؤمرو، آجی- شیرین}؛
آرزولاریم قاچاق دوشدو
توتانمادیم مین‌دن بیرین؛
دئییرلر کی
سن قوروسان
ماتمینده دوشه‌جکدیر ائل دیدرگین.
ایندی تکی بیر آرزوم وار:
نه کی قادان- بلان واردیر
گلسین منه آی سؤیگولوم!
اورمو گؤلوم!
