منیم طالعیمی سسله‌ینده سن
طالعیم بیر داها اوزومه گولدو .
عؤمور گونلریمین قارا دفتری –
جیزمالانمادی دای، بوتؤو بوکولدو.
آچیلدی بختیمین آغ‌راق یول‌لاری،
قارا گؤیلرینده سپیلدی اولدوز .
اویاندی طالعیم، دئییردیم کی بس-
دان سؤکولمه‌میشدن بانلامیش خوروز.
اومید سینه گردی یاسا – نیفرته،
گؤزوندن کؤنلومه ایشیق ساچیلدی.
امل پؤهره وئردی باهار اولمامیش
باهارین یول‌لاری منه آچیلدی …
سن گولدون، اوزومه گولدو کائنات،
وئردی قانات منه، گولوشون سنین.
گونش قدرتینده گولومسر اوزون
داغیتدی باشیندان عؤمرومون چنین.
دؤنمه خیالیما، دؤنمه دویغوما
گل دوغما اول منه، وارلیق اول منه!
شورانلیق عؤمرومده سولما آی گولوم،
اولما تیکان منه، اولما کول منه!
ساچیل گونش کیمی، پارلا آی کیمی!
ضیالی حوسنوندن باخیب دویماییم.
نئجه قیییم سنی گونشین، آیین –
یئرینه قویماییم، نئجه قویماییم ؟!
سن منه بیلمه‌دین نه وئردین داها،
منیم دار گونومده اومیدیم اولدون.
سن تک اؤز الین‌له، اؤز عملین‌له-
کؤنلومدن آجی، کول – تیکانی یولدون.
ایستر یا ایسته‌مز ال‌لرین باتیب
عؤمرومون آجی سوو تیکان کولونا.
آجی وارلیغیمی یولوشدورانیم
منی ده گل آپار سئوگی یولونا!
