آنام دیلده دانیشیر بو:
تورکو – تورکو …!
نه دئییر بو؟!
ائشیدیرم آنام دیللی بو کیمسه‌نی:
نه یامانجا یامان دئییر،
هر گلنه بیر داش آتیر
هر گئده‌نه تولازلاییر
او اؤزونه اوخشامایان آیری‌لاری
قارا – قارا
قارقیلاییر.
آنام دیلده دانیشیر بو، هم ده یازیر:
تورکو – تورکو …!

آنام ایسه تورکو دئییر،
تورکو – تورکو …!
آمما حاییف،
دئدیینی یازانماییر بیر کلمه ده!
او هر وعده نامازیندا
قوللارینی ائله آچیر آسیمانا
ائله بیل کی،
قوجاجاقدیر بو جهانی بیرجه آنا.
تانریسیندان
دونیاداکی آج – یالاواج اوشاقلارا
خوش دیلک‌لر دیله‌ییر او؛
بو دونیایا قوجاق دولو باریش آرزو ائله‌ییر او.
-«هامی بیزیم قارداشیمیز، باجیمیزدیر»، دئیه هر آن-
ساغلیق ایستیر اینسانلارا تانریسیندان.

من بو دیلین وورغونویام،
آنا دیلیم
دیلیم – دیلیم دوغرانسادا
یئنه وارام، آنام واردی؛
هر نه‌ییم‌له یاشایاجام
اینسانلارلا چییین – چییین،
قوشا اوره‌ک،
قوشا دیلک،
آنا دیلیم‌له
بؤیوک ائلیم‌له.

اسفند ۱۴۰۰