صنعت سماسیندان آخاندا اولکر
چؤکدو سیس دومان تک هر طرفه غم
یاییلدی ائل ایچره بو غملی خبر
باشا – باش بورودو اؤلکه‌نی ماتم
زیلده کمانچالار، سیزلار آغلادی
قوربت هاواسییلا سازلار آغلادی.
اوفوقلره ساری توتغون بیر سحر
قیزیل شفقلرله آل بویانارکن
ماتمه باتدیلار کند، اوبا، شه‌هر
سانکی آغلاییردی بو آنا وطن
کؤکسومده قوور ائده‌ن کؤزلر آغلادی
قوربت هاواسییلا سازلار آغلادی.
دنیزلرین آهی دؤندو دومانا
سهندین، ساپلاغین باشینا چؤکدو
دؤندو ساوالانین اوره‌یی قانا
شلاله سئل کیمی گؤز یاشین تؤکدو
دره لر آغلادی، دوزلر آغلادی
قوربت هاواسییلا سازلار آغلادی.
آنامیز وطن ده سینه داغلادی
او سحر کی اولکر سمادا سؤندو
قونچا قه‌هرلندی، گوللر آغلادی
چایلارین نغمه‌سی ناله‌یه دؤندو
سونالار اوخشادی، قازلار آغلادی
قوربت هاواسییلا سازلار آغلادی.
یاز بولودو کیمی گؤزلریم دولدو
کدر عمّانیندا غرق اولدو گمیم.
شئهلرین اوستونده گوللر ده سولدو
منیم ده باشلاندی قارا ماتمیم
اوره‌ییم چاغلادی، گؤزلر آغلادی
قوربت هاواسییلا سازلار آغلادی.
کاغاذا ناله‌می یازماق ایسته‌رم
سانکی کلمه‌لر ده یاسلی اولدولار.
اوره‌ک سؤزلریمی شعریمله دئدیم
کاغاذ دا، قلم ده درده دولدولار
قلم ناله چکدی، سؤزلر آغلادی
یانیق کرمی ایله سازلار آغلادی.
آذر ۱۳۶۴ – تبریز
یک پاسخ
ایللر گوزله دیم بیریسی تاپیلا حبیب ساهیرین آجیناحاقلی تراژیک اوز قییمی
( انتحار) سیاسی تاریخی پسیکولوژیک باخیندان اینجه له نه؟ کیمسه بو سیاسی تاریخی قونونو اونمسه مه دی.اوختای اونا تای، تقی رفعت اونا تای.و…بو تراژدی لردن دولایی بوگون بیزیم شعریله یازینیمیز گئریلریک باتاغیندا گؤمولموش.