حامبال قبری اوستو
چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده
00:00
00:00

هوروت هورت باخیرام
هاوادا اوینایان دومانا
و بیر نفس داها چکیرم.

اویناییرلار ایچیمیزده کی اوشاقلار
دوشونجه‌لریمیزین داملاریندا
خوانسارین نئشه‌سی گیجلتمیش بیزلری
هئچ آنلادا بیلمیریک او اوشاقلارا
یوکسکلیگین تهلوکه‌سینی.

محرم ققه‌چی
ایکینجی چاییمیزی گتیریر
باخیشلاریم دومان ایچینده اوینایا اوینایا
بیر نفس داها چکیرم،
محرمه ساغول! و
یان صندلده اوتوران حامبالا
بویور! دئییرم.

آجی چایی قورتوم- قورتوم ایچیرم
سویون قورهاقور سسینی دینله‌ییرم
دیوارداکی پهلوان رسمی باخیر ساغینا، سولونا
اییلیب فیسیلداییر اسماعیلین قولاغینا
دئییر آیلتسدن آلتی آلمالیسان آمما!

قاری کؤرپوسونده اییلیرم
اییله- اییله بیر نفس داها چکیرم،
الیمی اوزادیرام میدان چایینا
چیرکلی سولاردا
بوغولان بیر شهر آختاریرام.

سارالمیش سودا اوزورم
باخیرام کؤمورون اودونا
یانا یانا بیر نفس داها چکیرم
اوزولورم اوزه- اوزه،
آخیرام آجی چایینا.

دومان ایچینده کؤچورم
خیاللاریم چؤکه- چؤکه
بیر نفس داها چکیرم.

هله یان صندلده اوتورموش حامبال
مستشار قفه‌خاناسیندا
آجی چایینی ایچیر،
ایکینجی خوانسارینی چکیر.

اوینایان اوشاقلار
بیر- بیر دوشورلر آشاغی،
کیمسه یوخ توتسون
دامدان دوشن او اوشاقلاری.
قویلانیرلار دوه‌چی خییاوانیندا
گرودا ییخیلان معجزه‌لرین
دام- دیوارلاری آلتیندا.

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

حامبال قبری اوستو

محمد احمدی‌زاده
www.ishiq.net

آذربایجان ادبیات و اینجه‌صنعت سایتی