باهار اوره‌کلی / ح. هریزلی
(کئچمش آغیر گونلریمیزده، ادبیات و اینجه صنعتیمیزین قایغی‌کشی زهرا خانیم آبدار(صدیق)ه اتحاف اولونور)
قارلی شاختالی قیش گونو
خسته‌لره نارسان هله؛
یایین قیزمار گونلرینده
یایلاقداکی قارسان هله؛
نه یاخشی کی وارسان هله.
نفسینده یاز عطری وار،
کؤکسونده آراز عطری وار،
سؤزلرینده ساز عطری وار،
خوش نغمه لی تارسان هله؛
نه یاخشی کی وارسان هله.
ائل قیزی‌سان، ائله یولداش،
ائل یولوندا آغاردی باش،
قوجالساقدا یاواش-یاواش،
اوره‌کجه باهارسان هله؛
نه یاخشی کی وارسان هله.
دؤرد بیر یانین ارکؤیون‌لر،
یولا سالدین توی-دویون‌لر،
کئچیب گئتدی آغیر گونلر،
یئنه ده سردارسان هله؛
نه یاخشی کی وارسان هله.
ای منیم باشیمین تاجی،
منه اولدون آنا – باجی،
منتداردیر سنه «حاجی»،
نه یاخشی کی وارسان هله؛
نه یاخشی کی وارسان هله.
۶/۳/۱۳۹۹ – هریس
