بابک
ح-هریزلی
یولونا گؤزتیکدیم آی اولو بابام
آغاردی گؤزومون شوه‌سی بابک!
زمانه جوروندان آز قالیر اؤله-
کؤنلومده آزادلیق هوه‌سی بابک!
اولمایا یاتیبدیر قیرمیزی بایراق!
اولمایا سؤنوبدور او اود، او اوجاق!
بوگون قاپیمیزدا گؤزوندن ایراق-
چؤکوب خلیفه‌نین دوه‌سی بابک!
گؤر نه گونه قالیب آذربایجانین،
یئرده‌می قالاجاق تؤکولن قانین؟
بؤیوک «شیخ ممد»ین، اَر «ستارخان»ین
یادلارا قول اولوب نوه‌سی بابک!
