منیم گره‌ییم
ع. ن. چاپار
– چوخ اوجاسان! دئدیلر
منه منی سئونلر!…
بو، نه‌ییمه گره‌گمیش؟!.
-سن قوجاسان! دئدیلر .
منه منی اؤینلر!…
بو، نه‌ییمه گره‌گمیش؟!.
من –
نه اوجایام آنجاق،
نه ده قوجایام – دئدیم.
من ،
بیر عؤمرون باشا – باش
فلاکتله گئچیلن
ان بؤیوک بیر گوناهی،
بؤیوک سوچویام – دئدیم .
منیم گره‌ییم اولموش
– ائله اینانیرام کی –
فلاکتله یاشاماق؛
فلاکتله بیر عؤمرون
قرینه‌لر بویوندا
آغیرجا نیسگیللرین
اوره‌ییمده داشیماق!.
منیم گره‌ییم اولموش
– ائله اینانیرام کی –
گؤزلریمین اؤنونده
میلیون – میلیون باسقینی
حاقسیزی حاقلی ائده‌ن،
قانونلارا بره‌لمک.
منیم گره‌ییم اولموش
گره‌گ یانیب – قره‌لمک !…
یوخ، یوخ
نه‌یه گره‌کدیر –
بوش – بوش بو اؤیوشمه‌لر؟!
منیم گره‌ییم اولموش
گره‌ییم، دؤیوشمه‌لر …
دؤیوش،
حاقسیزلیق اوچون فلاکت دوغورانلا؛
عدالت – دئیه،
ظولمو حاق ایله یوغورانلا …
منی سئون‌ده سوسسون!
منی سؤین‌ده سوسسون!
من هئچ، اوجا دئییلم
هئچ، قوجادا دئییلم؛
من، حاقسیزلیق اؤنونده
حاققین سؤز پناهی‌یام؛
من، ظولوم سئوداسیندا –
یانان انسان آهی‌یام؛
من، انسانین شعوردان –
یارانان گوناهی‌یام!!!…
۱۳۷۰/۰۵/۰۲
