یاغما یاغیش
ع.ن. چاپار
یاغما یاغیش بیر قاریش!
قوی یول اولسون –
پالچیغین ایچیندن یول کئچمه‌یه!
یاغما یاغیش بیرداها!
قوی آیدین اولسون هاوا،
گؤزلرده قودرت اولسون آددیم یئرین سئچمه‌یه!
یاغما یاغیش، ائتمه یاریش!
سن تیققا – تیق تؤکرسن،
من دئه ها دئه دئیه‌رم.
سنی-
کؤکو گؤزله‌سه بیر یالقیزجا آغاجین؛
منیم ده حیاتیمین کؤکو گؤزله‌ییر ایندی –
یالقیزجا بیر یول اوسته.
محبت چلنگینی بسله‌ییب دسته – دسته،
سره‌جکدی کؤنلومه!..
آغاج بوداقلاریندا حالقالانان گونش تک
سئوینج وئره‌جک او منه
بو گون اتک – اتک…
یاغما یاغیش،
سن ده گَل حیاتیملا بیر قاریش،
گؤر نه‌لر کئچیر فیکریمدن بو آن!
اینان کی،
سئل اولوب آخاسان دورمادان،
نه یولونو بورارسان
نه منی سووودارسان.
منیم آخی اوره‌ییم –
گؤروش محبتی‌نین آلووونا ایسینیر؛
بو آلووون اودوندان قالخان ایتی توستویه –
سنین ده اوره‌یی‌نین باشی قارا توتور، هیسینیر!
قلبی قارا بولودلو !
یاغ ایندی کی یاغیرسان.
دونیا یاشدا اولاسان
یئنه ده باخ، ساغیرسان!
ائله بونا گؤره کی،
اوره‌ییمین اودونو
دامجی – دامجی دامینان،
یا خود سئل تک آخینان لئهلی سویون
سؤندوروب، کُوله چئویره بیلمز.
پالچیغین ایز ایتیریب، نه قَدَر آیریم سالا
منیم سئوگی یولومو
بؤله چئویره بیلمز.
تاپارام سئوگی یولون اَمَلیمین گؤزویله؛
اؤز یولومو تانیرام اوره‌ییمین سؤزویله!
۱۳۶۶/۰۳/۰۵ – تبریز
