من سنم، سن ده من !…
ع.ن. چاپار

گؤزوم گؤردو،
اوره‌ییم چیرپیندی،
سئویندی،
گولدو …
گؤزوم گؤردو،
اوره‌ییم چیرپیندی،
کؤورلدی؛
خیسین – خیسین آغلادی؛
اینانا بیلمه‌دیم بو منم
وارام !..

حضورومدان منه
بعضاً –
کیمیسی گولدو؛
کیمی –
آغلادی؛
کیمی دوداق بوزدو؛
کیمی –
بیلمیرم نه دَن!-
ظنّیمجه
اوره‌کدن –
اوره‌ک باغلادی؛
اینانا بیلمه‌دیم بو منم
وارام !..

نسه،
گونلر گلدی،
ایللر ده کئچدی؛
منسه وارلیغیما-
یوخ …
هئچ دی دئدیم؛
اؤزومده دردلَشدیم،
هئی ده
درد یئدیم ! …

بیر گون،
تزه‌جه بیر گونه ائله بیل واردیم،
پس، وارام – دئدیم.
ایناندیم کی ائله،
دونن ده واردیم !.

بیرگون،
گؤز اؤنومده دوران بیر گؤزه‌ل،
– بیر گوزگو کیمی –
منه، کیملیییمی
عکس ائتدی صاف- صاف.
آغلادیم،
آغلادی؛
گولدومسه گولدو.
وارلیغیمدا دوشن دویوملولوکلر
آچیلدی بیر – بیر،
کلاف – کلاف!…
صافا چیخدی اؤزلویوم.
من –
وارام ، دئدیم؛
نه غصّه ائیله‌دیم،
نه ده غم یئدیم …

هله ده وار،
اونون اینجه سسی
قولاغیمدادیر !.
او منه ،
من سن‌ام،
سن ده مَن!.. _
دئییر.