قادین
ع. ن. چاپار
منی شهوت اوچون آمان
پول وئریب، پولا آلمایین!
زولفومو زنجیر دئییبن
ائوده زنجیره سارمایین.
تاریخی بیر واراقلایین
“زئوس”۱ قادینی یام”هِرا”۲.
آدیمدان یارانیر منیم
اوره کده عشقه مین سرا.
“ائریس”۳ آدیم، زئوس قیزی
گؤیلره قورشاغام باخین!
چلنگ کیمی ساچلاریمی
باشیزا تاج ائدین تاخین!
“آتنا”۴ منم ، عاغلیزا روح،
هوشوزا قدرتم اؤزوم.
تاریخیزی یازیر زرین
باشدا محبتله سؤزوم.
“دیمیتئر”م۵ اؤلکه‌نیزه
اکین چیخار آدیملا هم.
محصولونوز بول اولاراق
محو اولونار اوره‌کده غم.
“دیونی سوس”۶ منم، منم.
اوزوملویه روح قاتانام.
کؤنوللری اسره‌یه‌رم
عشوه ائدیب ناز ساتانام.
منی شهوت اوچون آمان
پول وئریب، پولا آلمایین!
زولفومو زنجیر دئییبن
ائوده زنجیره سارمایین!
عشقی منم یاراتمیشام
“آفرودیت”ام ۷ عشقه خُدا.
کیمسه کی آتسا عشقیمی
تک قالاجاق، هم ده جُدا.
“آرتیمیس”ی ۸ ائشیتمیسن
خَلق ائله‌ین جاوانلاری؟!..
روح دا وئرن اونلارا من
داماردا خَلق ائدن قانی؟
“تیامات”آم ۹، اصلیده من
زولفو پریشان قادینام.
خشمیمه باخ، قهریمه باخ
وارلیغینام، هر زادینام!
“آناهیتا”۱۰ اود آللاهی
“مهر”۱۱ ایله بیرگه یاشارام.
یالاندی هر کیمسه دئسه
سئوگی یولوندان چاشارام.
محاریبه ائیله‌مه‌یین
ووروش نه‌دیر آتین داشین!…
“هئستییا”۱۲یام ، صولحه نیشان.
آدیملا عرشه دیرماشین.
منی شهوت اوچون آمان
پول وئریب، پولا آلمایین!
زولفومو زنجیر دئییبن
ائوده زنجیره سارمایین!
“پاندرو”یام۱۳ ازل قادین
“وولقان”ی۱۴ تانری سانمیشام.
اودلا دمیردن یارانان
” ائمپیته”یی۱۵ اَر آنمیشام.
“مینرو” ۱۶ منی یاراقلادی
حُوسنی صیفاته سسله‌دی.
دونیادا هر نه علم وار
منده بئجرتدی، بسله‌دی.
“ایزیس”۱۷ ایلاهییم بیلین
علم و هنر منیمله‌دیر.
ایسته سنه سویومدان ایچ
ایسته‌مه‌سن سنینله‌دیر!..
قدیمکی یونانا “فالوس”۱۸
مقدس آللاه اولموشام.
ستون، میناره شکلیده
هر اؤلکه‌نیزده دولموشام.
“مشیانه”۱۹یم،”مشیا” ۲۰ اریم
بیر آغاجین بئلیندن‌ایک.
خیلقتیمیز ده بیر اولوب
صلح و صفا ائلیندن‌ایک.
منی شهوت اوچون آمان
پول وئریب، پولا آلمایین!
زولفومو زنجیر دئییبن
ائوده زنجیره سارمایین!
ایضاحلار:
۱) زئوس – قدیم بونانستانلارین آللاهی
۲) هِرا”Hera” زئوسون آروادی کی خود بوتون قادین و دونیا قادینلازینین تانریسی سایلیر.
۳) ائریس”Eris”زئوسون قیزی. گوی قورشاغی تانریسی《خدای رنگین کمان》
۴) آتنا”Athena”عقل ، فراست و هوش آللاهی. آتنا دا قادین ایمیش.
۵) دیمیتئر”Demether” تاخیل تانریسی. خدای غلات (زن)
۶) دیونیسوس”Dionysus” اوزوملوک ایلاهه سی(خدای تاکستان)
۷) آفرودیت”Aphrodite”الاهه ی ربّ النوع
۸) آرتئمیس”Artemis”گنج وجاوانلاری یارالدان و اونلاردان حیمایه ائدن ایلاهه.
۹) تیامات: بابلستانلیلار اساطیرینه گوءره بیر ایلاهه. گویا کی هر بیر نسنه اوندان توءره نمیش. بو ایلاهه همیشه پریشان زولفولو، قورخونج و قهّار قادین ایلاهه ایمیش. بوتون یارانیشین ایلکین مایاسی دئمک تیامات میش.
۱۰ و ۱۱) قدیم زردوشت لرین اَویستا《ادبی – ایدئولوگییا سندلرینده》آرواد-کیشی فرقلنمیر. آناهیتاقادین اولدوقدا مهر ایسه بیر کیشی کیمی عزیزله نیر.
۱۲) هئستییا”Hestia”اولئمپییادا صولح مظهری واود قوروقچوسو کیمی ساییلان ایلاهه دیر.
۱۳؛۱۴؛۱۵) پاندرو”Pandore”ازل ایلاهه دیرکی، یونانستان میتولوگییاتعبیرلری اساسیندا، وولقان”Volcain”اود و دمیر آللاهی نین امری ایله یارانمیش دیر.
۱۶) مینرو “Minerve” عاغل،حیکمت و بیلگی ربّ النوعی. پاندرو نو مبعوث ائدرکن اونون وجوووندا کمالات و علم صیفت لری یارالدیر.
۱۷) ایزیس : قدیم مصر لیلرین بیلیگی، هنر و معرفت ایلاهه لری آدلانیرمیش.
۱۸) فالوس “Phallos” قدیم یونانیستانلاردا قادین جنسی عضوو شکلیلینده میناره وستون لار تیکیلرمیشده کی ، تقدسلو نمادینمیش و یونانیستان کومئدینلری فالوس شکیلینده ماسکالاری دا اویونلاریندا اوزلرینه تاخارمیشدا و آپاریچیلیق روللارینی دا ائدرمیشلر.
۱۹ و ۲۰) زردوشت عقیده لری اساسینا گوءره، مادلارحکومتی دوءورونده برابر بیر آغاجین بئلیندن یارانمیس مشیا ومشیانه آللاه وایلاهه سی.
