مرحبا شهریم
محمد احمدی‌زاده
دلی ائلیر منی شهریمین هاواسی
محلله‌میزین دار کوچه‌لری
آلچاق دیوارلاریندان ساللانان
اوشاقلیق گونلریمین تورپاقلاری
دلی ائلیر منی شهریمین هاواسی
اوستو اؤرتولو بازارینین سرینلیگی‌له
سئحیرلی قارانلیغین سرگیله‌دیگی
سونسوز عشقین مؤحتشم حرارتی
دامداکی باجالاردان گونشین باخدیغی
ایکی سئوگیلینین یوخلایان سسسیزلیک کؤرپه‌سینه
رؤیالاریمین کپنکلری سوروشار
گونشین آغ ساچلاریندا اوینایان توزلاریندان
سینان قانادلارین چیله‌لرینین آدرئسینی
بؤیوک ننه‌مین حنالی اللرینین قوخوسونا
سجده ائلر شوشرخانا بازارینین موقددس قوببه‌لری
سئیید عطارین گولومسه‌لریندن اوچار
شکر پنیرلرین آغ رنگلیگی
قونار اللریمده‌کی هوسلرین ایسلاق چیچکلرینه
و
ترلی اوووجلاریمین چیزگیلری
اوزایار آلنیمین قیریشلارینا
آخار گؤزلریمدن
ایللرین یاشلاری دوداقلاریما
پیچیلدار سسسیز صداسیز قولاقلاریما
دلی ائلیر منی شهریمین هاواسی
تورپاغی، گونشی، گونلری
جومه آخشاملارینداکی کدرلی گون باتیملاری
دلی ائلیر منی شهریمین هاواسی
مرحبا
مرحبا تبریزیم منیم
مرحبا
