سئوگی باغی
محمد احمدی‌زاده

سارالیب سولوبلار مئشه‌لر،
سوسوز قالیبلار چئشمه‌لر،
شاختا ووروب آغاجلاری
قورویوب یانیبلار لاله‌لر.

داغلار، داغلار ایزسیز داغلار،
زیروه‌لری قارسیز داغلار،
ایگیدلرین جانین آلیر
گنج یاشلاردا سسسیز داغلار.

سو گلیب آخیر گئدیر،
دوشوننی یاخیر گئدیر،
بو دونیا بیر پنجره‌دیر
دوشونمه‌ین باخیر گئدیر.

بو دونیانین دیواریندان،
گلن باخیر باجاسیندان،
کیمسه گؤرمور هامیسینی
بیر باجانین آرخاسیندان.

سئوگی ییخار دیوارلاری،
سیلر گؤزلردن پاسلاری،
ایکی کؤنول  بیر اولونجا
آخماز گئجه گؤز یاشلاری.

آخان قان اولمایایدی،
یارپاقلار سولمایایدی،
سولار جوشوب سئل اولایدی
قیلیجلار پاسلانایدی.

یام- یاشیل اؤلکه‌دیر اوره‌ک،
تزه‌له‌یک، گل دوز چؤره‌ک،
گئچمیشلری یادا سالیب
اود اوستونده چای دمله‌یک.

دوشمنلیگه گل داش آتاق،
سئوگیمیزه، گؤز قاش آتاق،
قول قولا وئریب گئدنده
آددیملاری یاواش آتاق.

قارا خاللی یاناغیندا،
ائیوانیمین قاباغیندا،
یاخاسی دار کؤینه‌یی گئی
سئویم سنی آی ایشیغیندا.