شعرلر
ع.ن. چاپار
۱- داغلار کیمی
داغلار بیزی اؤز قوینوندا ساخلامادی
اوجالاردان باخدی بیزه؛
دره‌لرده یاشادیق بیز
دره‌لرده،
ذیروه‌لره فیکیرلشدیک!
ذیروه‌لردن،
یوکسک‌لره هاوالاندیق فیکریمیزده
باسیلماز بیر قالا کیمی –
قالالاندیق فیکریمیزده!
بیز
داغ اولدوق –
داغلار کیمین !…
۲- دوشونجه !
من دنیزی دوشوندوم
دنیز ایچیمه دولدو!
دنیز –
منده بوغولدو!
بالیقلاری دوشوندوم
بالیق، وارلیغیم اولدو!
یئنی دنیز. . .
یئنی بالیق . . .
سوندا –
مندن دوغولدو! . . .
۳- آغری
سؤزلریم آغری‌ییر،
آغری‌ییر دانیشیقلاریم
سنین دانیشدیغیندان.
یوخ . . .
سن –
گولوش نیشاناسی،
سئوینج کانی‌سان.
بو –
من اؤزومم،
آغری‌یام
آغری! . . .
۴- قافیه
دئییرلر سؤزلریم ارکانسیز اولور –
قافیه‌سیز اولاندا!
کؤنلوم حیاتیم‌دیر،
حیاتیم – شعریم.
“کؤنلوم = حیاتیم ”
“یار” “وار”لا جورلاشیر-
قافیه اولور!.
وار- ینا قارینداش..
او، اییه اولور…
کؤنلومه قافیه تاپا بیلمیرم!
ک
ؤ
ن
ل
و
مه!. . .
