قوپ – قورو  ناخیشلار
ع.ن.چاپار

گؤزه للیکلره سوسودوق ،
یئر یاغیشا سوسایان کیمی .
گؤزه للیکلر ایچیمیزده دولاراق ،
سئوگیمیز اولدولار-
تومورجوقلار ،
دیبجک ده –
گوله  دولان کیمی !..
گؤزه للیکلردن دویدوق .
سارسیدیق سونرا .
یئر یاغیشدان دویوب ،
شیرتاشیرتلی پالچیغا دؤنن تکین .
گؤزه للیکلر ایچیمیزده قیژقیراراق ،
سئوگیمیزی سولدوردولار ،
–    دیبجک ده کی –
سارالیب – سولان ،
قوپ – قورو ،
خیششاخیش ،
اوغولوب – تؤکولن ،
گوللر تکین .
و ، سوندا …
یئنه بیز قالدیق .
تک   –
تنها  !..
گؤزه للیکلر – ده ،
خیالیمیزداکی ،
قوپ – قورو
ناخیشلار اولدو …