آچ قاپینی
محمد احمدی‌زاده

آچ پرده‌لری
سؤندور ایشیقلاری
قوی آیدینلاتسین اوطاغی
سحر گونشینین ایشیلدامالاری!

سیل یورقون اللرینله
کیرلی نفسلردن بوغلانان
سویوق جاملاری!
ایزله شفقین اوزون ساچلارینی،
اوزون ساچلی قیزلارین
یئللرله اوینامالارینی!
آچ بو پنجره‌نی دینله
اسن یئللرین سازینی!

آچ قاپینی
گیرسینلر ایچری
گونشین قیزلاری،
هؤرسونلر دویون دوشموش
اومید ساچلارینی!
قوی سسلنسین اوطاقدا
یئللرین اویون هاواسی،
اویناتسین یئرلریندن
کئیلشمیش دوشونجه آیاقلارینی!