اولمایایدی سون باهار!
محمد احمدی‌زاده

گئدرکن هئچ‌ ائشیتمه‌دین‌می سن
گزیب دولاشان یئللرین-
اوغولتولارینین گولونج سسلرینی؟
باخچانی ترک ائتدیگینده هئچ‌ گؤرمه‌دین‌می
دوداقلاریمیزداکی اکدیگیمیز آغاجلارین
یاشیل یارپاقلارینین سارالیب سولماسینی؟
هئچ‌ گؤرمه‌دین‌می سن
یئرده کی یارپاقلارین اوزه‌رینده
یئللرین آیاق ایزلرینی؟
ائشیتمه‌دین‌می آیاقلار آلتیندا ازیلن
یارپاقلارین خیشیلتی سسینی؟
گئچیب گئدن گونلریمیزین حسرتینده اولان
کدر دولو نغمه‌لرینی؟
و….
گله‌جک گونلرده کی قارا قیشین
اونودقانلیق فیرتینا سسینی؟

کاشکی هئچ ازلدن اولمایایدی سون باهار
باخچادا اکیلمه‌یئیدی هئچ ده هئچ آغاج
سارالیب سولمایایدی
دوداقلاریمیزداکی یاشیل یارپاقلار.