هره‌نین اؤز دردی وار
حبیب فرشباف

سریب الوان بویالارین
دوزوم – دوزوم ایلک باهار.
قاتار – قاتار سیرالانیب
توپا، پامبیق بولودلار.
پیچیلداییر قولاغینا
کپه‌نک‌لر گوللرین؛
یاز نفسلی سحرین
ماهنی اوچور هاواسیندا؛
دنیا باتیب سئوینجه،
دوشونجه
گنج‌لیک
تک‌‌لیک…

بو آن آیاق سسیندن
گلیر آت کیشنه‌مه‌سی؛
ماهنی سوسور بیرآندا،
بیردن، بیر یاد نفسی؛
کوزه‌نین ضربه سیندن
سینیر بولاق آیناسی.

ساچلارینی گیزله دیب،
اورکک گئری‌یه باخیر.
کوزه‌سینی دولدوروب،
قیوراق آیاغا قالخیر.
دایانیر قارشیسیندا
دونیا گؤرموش بیر قوجا،
ائنیب آتدان سو ایچیر
بوز بولاقدان دویونجا.
بیر توخدادیب اؤزونو
قیزا توتور اوزونو:
-قیزیم دوه گؤرمه‌دین؟
– آنام وئریر آی عمی
آنجاق آتام
چوخ چکر هله راضیلاشماغا
تکجه علاجیم قالیب
قوشولماغا،
قاچماغا.
– سنده‌ن د‌وه سوروشدوم
قیزیم!
سن نه دئییرسن؟
منی بیر اؤزگه‌سینه
سن اوخشادیرسان بلکه؟
– آتین سور ای …آی عَمی،
هره‌نین بیر دردی وار
واللاه دوه‌دن یئکه.