«گؤره‌سن صاباح گله‌جک؟» دئدیک‌ده گؤزلریمی یومورام. قوللاریمی ایکی طرفه آچیب، شهادت بارماقلاریمدان باشقا دیگر بارماقلاریمی یومورام. آچیق بارماقلاریمی تله‌سیک بیرـ بیرینه یاخینلاشدیریرام، گلمیر. «گؤره‌سن بیریسی گون…؟»، «گؤره‌سن داها بیریسی گون…؟» چاره‌م کسیلیر، لاپ گئج اولسا دا، هفته آخیری گلمه‌یینه راضی‌لاشیب، بو دؤنه اللریمی احتیاط‌لا بیرـ بیرینه یاخینلاشدیریرام. گئجیکمه‌ییندن اوره‌ییم چیرپینیر، گؤزلریمی آچیرام، بارماقلاریمین بیرـ بیریندن سوووشماسی اوره‌ییمی سیخیر. چوخدان بئله گلمه‌ییب‌دیر. ایکی داشین آراسیندا اولموش اولسا دا تاپیب گتیرجه‌یم. بارماقلاریمین اوجو بیرـ بیرینه دیدیک‌ده، گؤزلریمی اینانمازجاسینا آچیرام، سئویندیییمدن ال چالاـ چالا آتیلیب، دوشورم. بیرینجی صینیفه گئتمه‌ییمه گؤره، مداد قابی‌لا، یازی ـ پوزی وسایلی گتیرمه‌یینه سؤز وئریب. بو هفته چوخ آغیر باشا چاتیر. الی دولو گلیر. بارماقلاریمین اوجونو اوجا سس‌له اؤپورم. گتیردیک‌لرین ییغیرام اوتاغین بوجاغینا، گئدیب‌ـ گلدیک‌جه ذؤوق‌ایله باخیرام. گئجه اونلاری اؤزوم‌له یاتیرماغا اوتانیرام. مدرسه‌نین آچیلماسینا تله‌سیرم.
نئچه گون کئچیب‌ـ کئچمه‌میش، یئنه ده داریخیب، گئتمکدن دانیشیر. همیشه بئله‌دی؛ گئج و چتین‌لیک‌له گلر، تئز و آسانلیق‌لا گئدر. ساعاتین گیزلدیب، گیریرم اوتاغا. «گؤره‌سن گلن هفته‌نی ده قالاجاق؟» گؤزلریمی یوموب، او قدر چالیشیرام کی گلن هفته‌نی ده ساخلایا بیلیرم.
* * *
گؤزومو آچاندان سونرا دا داریخیرام. گئج ـ گئج گلردی، آمما بیر بئله یوبانمازدی. گئجه‌دن بری اورییمی داریخماق سوچونا دارا چکیرلر. یئنه شهادت بارماق‌لاریما سیغینیرام. نئچه ساعاتدی چالیشیرام اونلاری بیر ـ بیریله گؤروشدورم، چوخ زامان کئچدییندن بلکه ده اونودوبلار بیرـ بیرلرینی. گؤزلریمین چاتلاغیندان دا باخیرام، اولمور. «اللریمین تیتره‌ییشیندندیر بلکه ده؟» دئیه، صندلده اوتورورام. گؤزلریمی یوموب، قوللاریمی آچیرام. اللریمی دویونلهییب، قویورام میزین اوستونه. شهادت بارماقلاریمی آچیب، اللریمی میزین اوستونده بیرـ بیرینه ساری زویولده‌دیرم. اؤزومو قوجاقلاماقدا گؤزلریمی آچیرام. ائو بوم‌ـ بوش بوجاق‌لار ایله یئر کوره‌سی اولوب سرعتله باشیما فیرلانیر.
هفته آخیری، آی آخیری، ایل آخیری، هئچ واخت… حاییف کی اوشاقلیق اویون‌لاریم یادیمدان چیخیب داها. نئجه اوندا بیر یوللوق ساخلامادیم اونو.
باشیمی قوللاریمین اوستونه قویوب، یئر کوره‌سیله بیرلیکده فیرلانیرام.
2 پاسخ
چوخ ساغ اولون روح انگیز خانم، سیزی تبریک ادرم بو قیسسا حیکایه نیز له بیر چوجوقون باخیشیله اینتظاری و یاشامین خوشبت لیک زامانلارین سرعت له کچمه سین و دنیا دا … چوخ گوزل و اتکیلی و دویقوسال آنلاتمیشسینیز. سیزه أوره کتن بویوک باشاریلار دیلریم.
اوره یینیزه ساغلیق حؤرمتلی خانم پور ناصح……سیزدن بو گؤزل یازینیزا خاطیر مینتدارام….قیسسا دا اولموش اولسا دؤنوب بیر داها اؤزومه و اؤزلویومه باخدیم…ساغ اولون.