قمر
رقیه کبیری

ـ «قمر!… قمر!… قمر!…»
“قمر” دهلیزین قارانلیغیندا بیر بوجاغا سیغیشیب، دیزلرینی قوجاقلاییب. اؤنونده‌کی قارین وئرمیش شئهلی، نمیش‌لی دووار، سانکی سینما پرده‌سی‌‌دیر؛ اوزاق‌لاری سئیر ائدیر…
کیشی اللری بئلینده، ایتییی ایتمیش کیمی، حیطین بویوندا وار-گل ائدیر. گوللو قوناق اوتاغیندا سیزیلداییر. زاریلداییر. قمر اکیزتایی اوغلانلاری پیلله‌کان اوستونده اوتوردوب، نوبه‌ایله قاشیق- قاشیق یئمک یئدیردیر. کیشی نین یومورتاسی ترسه دوشوب سانکی. بیر یئرده دورا بیلمیر. بیر آن قوناق اوتاغیندا های قوپور. کیشی ایکی اللی باشینا چالیر:« ائویم ییخیلدی!» دئییر. قمر کیشی‌یه باخمادان اکیزتایی‌لارا یئمک یئدیردیر.

ـ «قمر!… قمر!… قمر!…»
قمرایسه کیشینین سسینی ائشیتمه‌میش کیمی یئریندن قالخمیر. سیزیلتی سسی هر هانکی بیر خارابادا یووا سالمیش بایقوشون سسیدی سانکی ائوینی بورویوب. اونا ائله گلیر کی «قمر» سؤزو هیجا- هیجا دهلیزده هاوالاندیقدا دام- دوواری کرپیچ- کرپیج باشینا ییخیلیر. اویسه ییخیق دووارین آلتیندا قالیر…
-«قمر…قمر…قمر…»
ندنسه بو گئجه کیشی‌نین سیزیلتی‌سی گوللونون سیزیلتیلارینا اوخشاییر…
قمر دفعه‌لرجه اوریینده دئیسه‌‌یدی ده، گوللو آیدین- آشکار حیطین اورتاسیندا کیشی‌یه باغیرمیشدی:«سنی گؤروم پیس درده دوشه‌سن» دئمیشدی.
قمر اؤنونده‌کی قارین وئرمیش دوواریلا دانیشیردی سانکی:«نه ده پیس درده دوشدو کیشی! دردین آغیرلیغی گوللونون اوزرینه یوخ، خارابالیخ کیمی منیم باشیما چؤکدو. ساعتدان بیر قانا بولاشمیش سودوکلو ملفه‌لری ییغیشدیران گوللو دئییل‌ کی، پوخلو، قانلی، سودوکلو ملفه‌لری سودا یوماخدان اللری قارییان گوللو دئییل کی،بئلینین قاتی آچیلمایا- آچیلمایا، کیشی‌نین لشینی قالدیریب، ال- آیاغینین پوخ- پوسورون ساهمانلایان گوللو دئییل کی!»
-«قمر…قمر…قمر…»
«آللاه سنی باغیشلاماسین گوللو! ائله قارغیش ائیلییردین کی، عوضینی ده اؤزون اؤدویردین آخی!»
قمر گؤزونو اؤنونده کی قارین وئرمیش دووارداکی سینما پرده سینه زیلله‌ییب…
قاپی آچیلیب، کیشی گوللودن اؤنجه حیطه گیردی. گوللوایسه قیپ‌قیرمیزی دوداقلاریلا کیشی‌نین آرخاسیندان اونا باخیب، ریشخندایله گولدو. گوللو او ائوین یابانجیسی دئییل‌دی. کیشی‌نین قارداشی اؤلندن بری، کیشی داها همیشه‌کیندن آرتیق قارداشینین ائوینه گئت- گل ائدیردی. قمر باشقا قادینین قوخوسونو کیشی‌نین وجودوندا حیس ائتمیشدی.
قمر سس‌سیز سمیرسیز تشتین ایچینده‌کی کیرلی پالتارلاری چنگه‌له‌دی. کیشی گوللویله اوتاغا کئچمه‌میش: «قوناق اوتاغینی گوللو اوچون حاضیرلا! بو گوندن، او دا بو ائوده قالاجاق» دئدی. قاپی دالیندان، «اوشاق‌لاری قویما گیرسین» دئییب، پنجره‌لرین پرده‌سینی سالدی. قمر وار گوجویله الینده‌کی چنگله‌له‌میش پالتاری کیرلی سویا چیرپدی:« ائوین ییخیلسین، ائویمی ییخدین کیشی!»
-«قمر…قمر…قمررررررر»
گوللو سیزیلدادی:« بو نه اوددو دوشدو جانیما قمر…
قمر‌ایسه قوناق اوتاغینین پنجره‌سینین هئره‌سینده اوتوروب، یورغان دؤشک ایچینده یاتمیش گوللونون ساپ-ساری سارالمیش گؤزلرینه باخدی. آغ- آپباق بنیزینه سانکی بئش میثقال ساری کؤک اله‌میشدیلر. قارینی طبیل کیمی اولموشدو. نئجه ده اونون خسته لییندن خبرسیز گونو گوندن شیشن قارنینی یئنی دن قیسقانمیشدی. بویلو اولدوغونو سانمیشدی.
-« قمر…قمر…موشتولوغومو وئر؛ اوغلاندی…» کیشی گوله- گوله قمرین اوتاغینین قاپیسینی آچیب، باغیرمیشدی. قمرایسه جوت قیزلارینی باغرینا باسمیشدی. کیشی گئتدیکدن سونرا الینی یئددی آیلیق بویلو اولان قارنینیا چکمیشدی:« آللاه! منی اوزو قارا ائله مه» دئمیشدی.
-«قمر!…آی قمر…»
قمر زیققیلدیا- زیققیلدیا زور وئریر. قارنی دوغراق- دوغراق اولور. بئلینین موهره‌لرینی بیر بیریندن آیرییلار. دوداغینی دیشی‌ایله سیخیر. باغیرماغی گلیر. حئیوان کیمی نعره چکیر…
-« اوغلاندی …اوغلان….موشتولوغومو وئر، اوغلاندی، اوغلان!» قابیله‌یه یاردیم ائدن آناسی‌دیر قاپینی آچیب کیشی‌یه سؤیله‌ییر. قمرایسه سود گؤلونه دوشور. وجودونو سونسوز بیر آرخایینلیق بورویور. یاش گیله‌لری یاسدیغینی ایسلادیر…
-«قمر…قمر… هارداسان قمر؟»
قمر اوغلو نو باغرینا باسیب، دهلیزدن حیطه چیخیر. گوللو قوناق اوتاغینین ائیوانیندا اوتوروب اوغلونو امیشدیریر. کیشی ایسه الینده‌کی سیجیللی لری قمره وئریر:« ائله ایکیسینی ده سنین سیجیللینه یازدیردیم. ایکی آی بیر شئی دئییل کی! ائله اکیز تایی یازدیردیم، قوی اکیزتایی قارداش کیمی اولسونلار بیر-بیرلرینه…»
قمر دونوخوب،ائیوانداکی گوللویه باخیر. گوللو کؤرپه‌سینی دؤشوندن آلیب، ائیواندان قوناق اوتاغینا قاچارکن:« سنی گؤروم پیس درده دوشه‌سن کیشی! اوغلومو الیمدن آلدین…»
-« قمر…قمر…قمر…»
قمر الینی دووارا دایاق ائدیب یئریندن قالخیر. دووارین قارین وئرمیش گچ‌لری خالچانین اوزرینه توکولور. ایکی قات اولموش بئلیندن توتوب، کیشی‌نین اوتاغینا ساری گئدیر. گئجه‌نین قارانلیغیندا هاردانسا بایقوش سسی گلیر….
قمر…قمر…
قمر…قمر…

اسفند ۱۳۸۷