یادیمدادیر چوخ آفات بیر اوشاقلیغیم وار ایدی. دینده- دوندا دورموردوم. صاف دیواردان یئریییردیم. ایندی کی زامان اولسایدی بلکه آدیمی «بیش فعال» قویوب دوختورلوقدور دئیردیلر. آمما بئله‌یدیسه ده او واخت بیلینمه‌دی. یازیق آتا- آنامین باشینا اویون قالمادی آچدیم. البته بئله ده بیلمه‌یین من رحمسیز بیری ایدیم. یوخ، بوتون گویرچین‌لر، سئرچه‌لر، ایت، پیشیک‌لر و ساییره حئیوانلار منیم دوستوم ایدی. بیر اوشاغا او دیلسیز- آغیزسیزلاری اینجیتمک ایذینی وئرمزدیم. گوللرین- آغاجلارین دیلینی بیلردیم. اونلاری اوخشاییب، تومارلاییب، اونلارلا دانیشاردیم. داما چیخیب قونشوموز قوشباز جاوادین قوشلارینی فیشقالاییب دامیمیزا چکردیم، اونلار گلیب دؤوره‌می آلاردیلار. قوللاریمی آغاج کیمی آچاردیم، قوشلار بوداق کیمی قوللاریما، باشیما قوناردیلار. اووجومدان دن یئیردیلر. من ایسه یاواشجا بیرینی توتوب، مونجوق گوزلریندن، دیمدیگیندن اؤپردیم. آنجاق نئینه‌ییم کی دجللیک و شررلیک قانیمدایدی.
یادیمدادیر دوققوز- اون یاشیمدا اسفند آیی‌نین ائله بو واختلار ایدی، تزه اوخولدان قاییتمیشدیم. آیاغیمی بیر باشماغا قیسنادیم، آتاما حؤکمن منه تاپانچا آل دئدیم.
آتام دئدی:
-آی اوغول سن ناتارازسان ووروب بیرینین گؤز- باشینی چیخاردارسان، شرمنده اولاروق هله هئچ، خاطا- قانا قالاروق، او قدر اویونجاقلارین وار اونلارلا اوینا دا.
اوندان کئچدی سو فیشقیردان، اوخ آتان توفنگین ده وار. هله سن بو سویوق سیلاحلارلا دا باشیمیزا آز اویون آچماییبسان، ایندی ده تاپانچا ایسته‌ییرسن؟!
بو دفعه آنام اوستومه پورسودو. آی اود پارچاسی چیخاردیغین پوخلاری هله ده یووا بیلمیرم. ائله او ایل تاراققا- ماراققایلا ائوی آز قالا اودا چکمیشدین، پیک‌نیک گازی ایله نه قلط دارتدیردین بیلمیرم، لاپدان اود آلدی، آللاه طرفی بیر شکیل “آتا”ن بئل ایله پیک‌نیکی حیطه توللاییب، گوج ایله اوستونه نه قدر ایسلانمیش پتو توکوب سوندوردوک، یوخسا ائویمیز هاوایا اوچاجاقدی. عاریمیزدان اود سؤندوره‌نه ده زنگ ائتمه‌دیک. اودور باخ شاه اثرین هله ده آستانا فرشینده قالیر. سونرا دا قاشینی دارتیب، حیرصلی گؤزلر ایله نئچه یئردن گارسیلان فرشیمیزه ایشاره ائتدی.
بیر زامان بیر فیشقا ایله دده‌میزی یاندیردین. صوبحون گؤزو آچیلاندان او قدر فیشقا چالدین قاپی- قونشو اوستومه یوگوردو.
بیر زامان چیگنینه چرشابیمی آتیب “زورو” اولوب نایلون شمشیری تووولاییب قونشو اوشاغی‌نین گؤزونه چکدین آللاه اوزوموزه باخدی گؤزو چیخمادی، ننه‌سی یارالی شئر کیمی اوستومه گلدی.
سو فیشقیردان توفنگله قونشونون بیر یاشلی کورپه‌سین قاپیلاریندا او قدر ایسلاتدین ستلجم اولدو.
ایندی ایسه بیرجه «هؤرومچک‌کیشی» اولوب دام- دووارلارا دیرماشماغین قالیب. هانسی اود- آلاویندان دئییم آی جییاری یانمیش؟!!
کیشی آماندی ها بو ننه‌سیزه تاپانچا زاد آلیب، بایراما یاخین باشیمیزا ایش آچما...
آغلامسیدیم،– یوخ من تاپانچا ایسته‌ییرم، اؤزو ده دوزدنچی اود چیخان تاپانچا. قونشو اوشاقلارینین وار. به اونلار پلیس- پلیس اوینایاندا کیشون- کیشون ائله‌سینلر منیم اولماسین؟! (بارماقلاریمی دا دوز ننه‌مه دوغرو، نیشانه توتوب، گؤزومون بیرینی قیییب، دوداغیمی اَیریسینه دارتیب، توفنگ آتماق اداسی چیخارتدیم).
بو سؤزلری بئله بوینومو بوروب مظلومجا دئدیم آتامین منه اوره‌یی یاندی. نه بیلیم بلکه ده اؤز اوشاقلیغی یادینا دوشدو.
آنام مطبخه گئتمیشدی. اوردان قاب- قاجاق تاققیلتیسی گلیردی.
آتام منه گؤز ووروب یاواشجا ایشاره ایله دئدی کی، ناهار یئییب بیرآز دا دینجه‌لندن سونرا گئدیب سنه تاپانچا آلاروق.
اوره‌ییم ساکینلشدی. شیرینکارلیق و اؤزومو یاخشی اوشاق گؤسترمک اوچون مطبخه گیریب آناما سوفره سالماقدا، قاب- قاجاق گتیرمکده کؤمک ائتدیم. آنام لاپدان بو قدر ائمین اوشاق اولدوغومدان بیرآز شوبهه‌لنیردی سه ده بیر سؤز دئمه‌دی. ائله تعجوبلو منه باخیردی.
ناهاری یئدیک، شیرینکارلیق اوچون دؤرد یاشدا باجیمین دا خوروشت اتینی دیدیب دویوسونون اوستونه تؤکدوم، گؤزل باجیم دییه اوزوندن اوپدوم.
ناهار یئدیکدن سونرا سوفرانی ییغیشدیرماقدا دا آناما کؤمک ائتدیم سونرا ایسه یاخشی بیر اوشاق کیمی بیر- ایکی ساعات یاتدیم. یانی یاتمادیم ها، اؤزومو یوخویا ووروب تاپانچام اولان واختا نقشه‌لر چکیردیم.
آخشام چاغی آتاملا قونشو اوشاق اویونجاغی ساتان توکانا گئتدیک. آتام منه ان دوغروچو توفنگه اوخشایان بیر تاپانچا آلدی. نئچه قاطار دا گولله. سونرا آتام مندن گؤز اولدو خیاواندان او تایا کئچیم، اؤزو بازارا گئتدی.
سانکی دونیانی منه وئرمیشدیلر. شیللاق آتا- آتا، خیی-خیی گئده- گئده ائویمیزه دؤندوم.
حیط قاپیسیندان کئچن آنام جین کیمی قاباغیما چیخدی. سانکی منی گودورموش. به من آخی اونو یوخودا قویوب گئتمیشدیم!!
بوتون سئوینجیم اوزومدن پوزولدو. قورخولو تاپانچانی آرخامدا گیزلتدیم. آمما ماجرا آنامین گوزوندن یایینمادی.
– قودوغ او نه‌دیر آرخاندا گیزلتدین؟!
– دیلیم توتولا- توتولا، — ه… هئ… هئچ نه– دئدیم.
اولمادی. آنام اللریمی آرخامدان چکدی. تاپانچانی و گولله قاطارلارینی گؤروب الیمدن آلدی.
— به دئمه‌دیم بو زهری- ماری آلما؟! سن دینج بنده‌سن بونلارلا اوینایاسان؟!
— آ…. آنام جانی کوچه‌یه چیخمارام. آرخا حیطیمیزده اوینارام. هئچ کیم ایله ایشیم اولماز. نه اولار… نه اولار… تاپانچامی سیندیرما. سنی آینازین جانی سیندیرما.
آیناز آنامین سون بئشیک بالاسی ایدی. اونو نه قدر سئودیینی بیلیردیم. آینازین آدی گلجک قولو سوستالدی.
— بو شرط ایله دئدیگینی عمل ائده‌سن. یوخسا من بیله‌رم سن. شرطینه عمل ائتمه‌سن یووانی گویده باغلا آیدین، چونکو سوپورگه اولاجاق بیر ده سنین بو جیلیز جانین.
تاپانچانی الیندن آلاراق الیمی گؤزلریمین اوستونه قویوب:
— منیم بو کور گوزلریم اوسته عزیز آنام.– دئدیم.
سونرا دابانیمی قووزاییب او اوز بو اوزوندن مارچیلداتدیم. گولوب:
— یاخشی شوربالانما.– دئدی.
تاپانچام الیمده سئوینجک هالدان آرخا حیطیمیزه قاچدیم. بیر قاطار سکگیز گولله‌نی، گولله یئرینه یئرلشدیردیم، گؤزومو قیییب خوروزوموزو نیشانه توتدوم. کیشون…. کیشون…. کیشون… کیشون….
فیکریمجه سسین ضربیندن یازیق خوروزون گؤزونه قوم پارچاسی سیچرادی، یوخسا دوغرودان تاپانچادان بیر شئی دَیدی، بوینو ترسینه دونَن حالدا، دؤوره‌سینه فیرلاندی، سونرا اؤزونه گلیب بوینو دوزلدیکده، اؤزونو شیشیردیب هیرسلی منه قُل- قُل- قُل- قُل ائله‌دی.
حیطیمیزین سکی پیلله‌سیندن ائنیب خوروزومو توتوب، اوزوندن اؤپدوم، منی باغیشلا دئدیم. آمما تاسوفله بیر گؤزو کور اولموشدو، اوزولدوم. آمما بونا هئچ چاره ائده بیلمزدیم.
سونرا ایسه در- دیواری اؤزومه فرضی دوشمان بیلیب، دلیجه باش- گؤزلرینه، قارینلارینا گولله بوشالتدیم.
آیناز باجیم هله منیم بو های- هاراییملا یاتمیشدی. یازیق اوشاق منیم دجللیک و های- هاراییما آلیشمیشدی. دونیانی سئل آپارسایدی ائله او یاتیردی.
یاواشجا اوتاغینا کئچیب بیر ایکی قولچاغینی گؤتوردوم.
حیطده اؤزومه هدف قویوب بوتون دلیک- دئشیک ائله‌دیم. اوزللیک‌له آنام یئنی آلدیغی یاتیب- دوران قولچاغینی. آییلاندا شبئهیم باشلاناجاقدی. بالاسی اؤلموش آنا کیمی جیکگیلتیسی گؤیه گئده‌جکدی.
او کی وار اوینایاندان سونرا، قولچاقلاری یاواشجا باجیمین اوتاغینا قویدوم.
آنام آشپازخانادا ناهار قابلاری ایله زادلا مشغول ایدی.
دهلیزه کئچیب، کوچه‌یه آچیلان قاپیمیزی یاواشجا آچدیم. دوستلاریمدان بیر- ایکیسینی گؤردوم. منی اویناماغا چاغیردیلار. تاپانچامی گؤستریب، ایشاره‌یله ائودن ائشییه چیخماغا یاساقلیغیمی دئدیم.
سونرا اؤزومو اوندا قویماییب تاپانچامی گولله‌یله دولدوروب اونلارا ساری آتدیم. هؤولومدن هئچ بیلمه‌دیم قونشونون ایکی- اوچ یاشدا اوشاغی قاپیلارینین پیلله‌سینده اوتوروب، تاپانچانین سسینه دیکسینیب، قانووا ییخیلدی. اوستو- باشی بوتون فاضلاب سویونا بلشدی.
اوشاغین ونگیلتیسینه او تایدان آناسی، بو تایدان منیم آنام چیخدی. قاپیمیزی چیرپیب، قاپینین دالینا سیخیلیب زاغ- زاغ اسیردیم. اوره‌ییم سئرچه اوره‌یی کیمی چیرپینیردی. آنام قولاغیمی ائششک قولاغی کیمی چکدی:
— ننه‌سیز، یئنه نه قلط دارتدین؟! خالقین اوشاغینا نه ائله‌دین؟!
هله هئچ زاد ائتمه‌میش، او قدر آدین دله‌دوزلوق، شئیطانلیغا چیخیب، هر نمنه‌نی سنین اوستونه ییخیرلار، کیمسه‌نین پیشیگی‌نین قیچی آخساسا، تویوغو لنگیسه، ایتی آسقیرسا، حتمن آیدین ائله‌ییب دئییرلر.
به سنه دئمه‌دیم کوچه‌یه چیخما؟!
کؤکسومو اؤتوروب، آنام جانی من کوچه‌یه چیخمامیشام– دئدیم. یالنیز قاپیدان باخدیم. او اوشاغا دا نه گلدی بیلمیرم.– یالاندان دئدیم.
— به تاپانچا آتان سن دئییلدین؟!
قورخونون بالاسی اؤلسون، یالاندان یوخ دئدیم.
یاخشی گئت جهنم اول اوتاغینا او زهریماری دا منه وئر. آخشام دده‌ن گلسین اونلا ایشیم چوخدو...
— آنام جانی داها آتمارام. باخ گولله‌لریم ده قورتاریب.(آمما یالان دئییردیم، گولله‌لرین نئچه قاطارینی اوخول چانتامدا گیزلتمیشدیم).
اوتاغیما کئچیب عزیز تاپانچامی دا اوخول چانتاما قویدوم. آخشاماجا درس کیتابلاریملا، باشقا سسسیز اویونلارلا بیر شکیل باشیمی قاتدیم.
صاباح اوخولا گئتدیم. اوّل زنگ زهلم گئتمیش ریاضی درسیمیز واریدی. من بو نئچه ایلده موطلق بو درس ایله باریشا بیلمه‌دیم. گئجه‌لر یوخودا دا ریاضی امتحانی کابوسو مندن ال چکمیردی. اؤیرتمنیم جیددی بیر آدام ایدی. چتین گولومسه‌‌ییردی. ریاضی کلاسیندا دا لاپ زهریمار- تولوغو اولوردو.
تخته‌نی یازیب- دولدوروب ضرب- تقسیم ائله‌ییردی. منیم فیکریم سئوگیلی تاپانچامدایدی. صوبح گولله‌یله دولدوروب چانتاما قویموشدوم. یاواشجا کیفیمدن چیخاریب گؤزومو قیییب، گؤزلوک یئرین میزان ائله‌ییب اؤیرتمنین تاس کلله‌سینی نیشانه توتدوم. لاپدان اؤیرتمن پورسویوب گچی منه طرف توللازلادی:
–هئی… آیدین علی‌نژاد!! او دالدا نه قلط دارتیرسان؟!!…
دیک آتیلیب، ماشانی چکدیم. تاپانچانین سسی، سسسیز کیلاسدا بومبا کیمی آچیلدی. اوشاقلار رنگ-روفو قاچمیش قاپییا ساری قاچدیلار، عالم بیربیرینه دَیدی.
اؤیرتمن دیکسینیب الینی اوره‌یینه قویدو، گؤزلوگو ده ضربدن یئره دوشوب سیندی.
سسه مودور- ناظیم دفتردن گلیب، ماجرانی بیلن منی دفتره سورودولر. عزیز تاپانچامی الیمدن آلیب آتاما زنگ ائتدیلر. شیرینکارلیغیمی یئددی قات اوسته‌لیگی ایله آتاما تعریف ائتدیلر. اوشاغینی ییغیشدیر دئدیلر. منی ده تاپانچادان، تاراققادان بوتون قاداغان ائتدیلر. عزیز تاپانچامی دا گؤزومون اؤنونده قیریق- قیریق ائدیب زیبیل دولونا تؤکدولر.
ائویمیزه قاییدان آتاما یالوار- یاخار ائله‌دیم اوخول ماجرامی آناما دئمه‌سین. من ده عوضینه سؤز وئردیم داها بایرام قاباغی پارتلایان شئیلرله اویناماییم. بو عهدیمه ده کؤنولسوزجه عمل ائتدیم.
البته آوانتورچولوق(ماجراجولوق) قانیمدا اولدوغو اوچون بؤیوینده، انتظامات پُلیسی اولدوم.
ایندی ایسه بایرام قاباغی بومبا پارتلادان شئیطان اوشاقلاری گؤرنده اؤز اوشاقلیغیم و دجللیک‌لریم یادیما دوشور.
بیرآز اوشاقلارا اوزدن گئدیرم. بیرآز دا اؤگود وئریرم چوخ خطرلی پارتلایان اویونجاقلارلا اویناماسینلار، آللاه ائله‌مه‌میش بایرام قاباغی پیس بیر حادیثه اونلارا اوز وئرمه‌سین.
“سون”
