پنجره‌دن سس گلدی. باشیمی چؤندرمکده دونوخدوم. آخی پرده‌لری چکمیشدیم! سحر ائرکن هر نه دن اول اونلاری چکمیشدیم قیراغا، آمما اوندا هئچ نه گؤرمه‌میشدیم.
ائشیک گؤرسنمیر داها. آغ آپپاق، یوخ، بیر آز توستولو؛ چن‌ایدی یوخسا چیرکینلیک. هر نه اولسایدی دایانمیشدی پنجره‌نین دالیسیندا، ایچری گیرمک ایسته‌ییردی. تلم تله‌سیک آیاغا دوروب، آغزی بورنومو بیر ماسکایلا اؤرتدوم.
بوغولتو گلیردی منه. دئییردیم پس دونیا آخیرا یئتیشیب داها. الیمدن نه گلردی؟ اؤزومو بیر بالاجا یئرده اوجا دووارلار ایچینده حیس ائتدیم.
هاواسیزلیقدان بوغولورام. هاردا اولدوغومو بیلمیرم، تانیرام دا تانیمیرام دا. قان اییی دولوب بورنوما. دانته دوزلدن جهنمه بتر اوخشاییر. ائله اؤزودی. بوردا منیم ایشیمین آدی نه؟ یاخشی او گون منی ده اؤزو ایله بورالاردا گزدیرمیشدی، یوخسا نه جور تانییاجاغیدیم. او گون هر قاتدا اولانلارین تاوانلاریندان خئیلک دانیشمیشدی. منیم هانسی ایشیمین تاوانیدیر، بوردا اولماغیم؟ گؤرن هانسی قاتیندایام؟ آستا ـ آستا یادیما دوشور. هه! یئددینجی ده، سالدیرقانلارین قاتیندا. بو حسابینان اون بیر قات آشاغی ائنمیشم، دؤرد قات ائو، یئددی قات دا بورا. نه ایچون بورالاری منه گؤرستمیشدی؟ اولمایا بیزیم ائوین آلتیندا دوزلدیب بورانی؟ او گون دئمیشدی، بو قاتدا بوتؤو آیریلارین حاققینا ال اوزادانلار یئرلشیبلر؛ بؤیوک قان تؤکن و ظولم ائیله‌ینلر ده بو قاتدا. منیمله اونلارین بیر قاتدا اولدوغوندان شاشقینام.
بو قاتدا اولانلارین یئرلری بیر ائنلی، درین ‌چایدی. بو چایدا سو یئرینه قان آخیر. هامینین باشی ایچری ده قالمالی، بیرینین حاققی یوخ باشینی بیر ثانیه‌ده ائشییه چیخارتسین. چیخارتسا ایه‌ر نئچه یئرتیجی، ناغیل‌دا اولان حئیوانلاردان (یاری آت، یاری آدام) اونلارا جان آلیجی اوخلار آتارلار.
اوره‌ییم آغریییر. بیر گورولتولو سس گلیر:
ائله بیلیردین هر نه قالاجاق ائله یئرده. مه‌یر ده‌ده‌وین یوخسا اؤزووون مالین‌ایدی یئر اوزو. الیندن گلنه اسیرگمه‌ییبسن. زیبیل‌دن آیاق قویانمیرام یئره. کارخانالاریزلا آوتوموبیل‌لریزین توستوسوندن نفس دالی قاییدیر. سدلرله قویولار طبیعتی لاپ هنجامادان چیخاردیب، هابئله آغاجلارین کسیلمه‌سی، داغلارین سؤکولمه‌سی، دریاچه‌لرین قوروماسی. ایکی و دؤرد آیاقلیلارا مه‌یر سن جان وئرمیشدین کی جانلارین آلدیراسان. ایندی گؤر آدام هر نه ائیله‌سه‌ده اؤزونه ائیلر. ایندیسه قان اوددوردوقلارین تک، قان اودماغین گرکلیدی.
چوخلاری اونون کیمین بوش یئرینه دانیشیب، هارا دیلی دانیشیر؟ زورایله سؤزلرین بیر یئره ییغا بیلیرم اودا دانته‌نین سایه‌سینده. اوگون بوللوجا دانیشدیرمیشدی هامیسین. ائله بیلیر منه قان اوددورماغینان هر نه دوزه‌له‌جک؟ اؤز اؤزومه دئیینیرم.
نفسیم داها چیخمیردی. آغزیمی آچیب دریندن نفس چکنده، اؤسکورمه‌یه دوشدوم. ‌بیرده پنجره‌دن ائشییه باخدیم. چوخ داریخدیریجی. ائشییه ده چیخا بیلمیردیم. بیر آز او حالدا قالدیم، آمما کی اوتوروب یاس آیه‌سی اوخوماقلا نه دوزه‌لردی. واختیم دا یوخایدی. اؤزومه گلیب بیر آز فیکیرلشدیم. بیردن چوخدان ائشیتدیییم کپه‌نه‌یین قاناد چالماسی یادیما دوشدی. ایه‌رسه او قاناد چالماسی‌ایله بیر آیری یئرده فیرتینا قوپارا بیلسئیدی، منیم کی پوفومون گوجو اوندان آز اولا بیلمزایدی. ایشیمی اعتبارلی توتمالیدیم، آیری یئرلرده اولان نئچه یولداشیما زنگ ووردوم، سنین بو ایشلریوین الیندن دئسه‌لر ده اونلارادا پوفله‌سینلر دئدیم. پنجره-نین قیراغینی آچدیم، اؤنونده دایانیب باشلادیم پوفله‌ماغا. پوفله‌یه‌رک آغاجلارا باخیردیم. چتینلیکله گؤرسنیردی. بیر آزدان آستا ـ آستا آغاجلارین نازیک بوداقلاری باشلادی ترپنمه‌یه. اوره‌ییم قیزینیب ایشیمه داوام ائتدیم. دومان پنجره‌نین اؤنوندن دالی چکیلیردی. پنجره‌نی بوتؤو آچیب داها پوفله‌دیم، آغاجلار داها ترپندیلر. بیردن بیر زاد دا گلدی فیکریمه، یولداشلاریما یئنه ده زنگ ووردوم. دؤرد قاتی آشاغی ائنیب پوفله‌یه‌رک، آغاجلارین گؤوده‌سیندن یاپیشیب احتیاطلا سیلکه‌لمه‌یه باشلادیم.
یئل بتردن اسیردی. گؤزلریمه اینانمیردیم. دومان تامامیله دالی اوتوروردو. هاوا ایشیقلانیردی. بیردن آنا بابالاریمیزا قیسقاندیم، آمما ایشلرینین داوام ائدیلمه‌سینی ده ایسته‌دیم. بو دؤنه تانیشلارین هامیسینا زنگ ووردوم، اونلارین هامیسی دا اؤز تانیشلارینا.
نئجه پس اونلار بؤیوک ایستکلری اولان، داریخدیریجی زامانلاریندا، بیر یئره ییغیشیب ساز چالیب، اوخویوب، آیینی اوینارمیشلار، ایسته‌دیکلرینی آلمایینجا دا ائولرینه قاییتمازمیشلار. ایسته‌دیکلرینی آلا بیلمه‌سئیدیلر ده بو دردی بیرلیکده چکرمیشلر. ائله یاخشی اولار چوخدان دا گؤروشمه‌میشیک، دئدیم.
چنایدی یوخسا چیرکینلیک گئتمیشدی، بلکه ده بیز باشارمیشدیک بو ایشی، کئشکه ائله گئدئیدی کی دالیسینا دا باخانمایایدی. اولمایا بیردن تصادوفی هاوا آچیلمیشدی. هر حالدا هاوانی گؤروب اوره‌ییم آچیلدی.
تزه‌دن دؤرد قاتی قیوراق اوسته چیخدیم. سئوینجک تلگراما گئدیب تزه خبرلری یازماق ایسته‌دیم. ال تلفونوم الیمده دونوخدوم. تلگرامین خبرلری و شکیللری یالنیز دانته‌نین جهنمی، پوف و آغاج سیلکه‌لمه!!!