یئنه دوداقلاری یئری سوپوروردو. داها دانیشدیرماق اولموردو اونو. قاشلاری آز قالیردی یاپیشا بیر بیرینه. گؤزلرینی قیییردی. رنگ به رنگ اولوردو. گاه سارالیردی، گاهدا قیزاریردی. اوزونه باخدیقدا گؤزلری تیکان اولوردو باتیردی آدامین گؤز باشینا.
بیلیردیم ائشیتمک ده اؤزونو ایتیره‌جک، بلکه ده بو زامان‌لار اؤزونو تاپیردی. آخی چوخ بوجور اولوردو. خروس بئوعده بانلاییردی، اونون حالی ده‌ییشیلیردی. هامینین دا ایشلرینین دیلماجی بو اولمالیدی؛ خروسدان توتدو، بوتؤو دوست، آشنالارادک.
قورخوسوندان گیزلتمیشدی. آخی اوزونون قیریشیقلاری تازا آزجا آزالمیشدی. سؤزون دئمیشدی: کارـ کاغاذلا اویناماق یئرینه بیر ایکی باغ سووزی آریتلاسان یاخشی اولار. سونرا دا کوسموشدو.
او گون ده سن نییه فیلانکس، بهمانکس‌لرایله ایلگین وار دئیه، بو حالا قالمیشدی. بو نه قدر ایلگیسی‌نین نییه‌سینی آچیقلاسئیدی ده، قادین‌لا، آقانین بیر ایلگی‌دن باشقا آیری ایلگیسی اولا بیلمز دئمکله دانیشیغینین سون نقطه‌سینی قویموشدو. بو هئچ نه دئیه بیلمه‌دن ایچریسی سوبایا دؤنموشدو. سو ایچسئیدی ده اوره‌یی، دیلی، بوتؤو گؤوده‌سی یانمیشدی. اوره‌یی آز قالمیشدی دلینسین. سونرا دا بیر هفته اونون اؤجورلوغونو چکمیشدی.
او گون ده بو یاوا ترپنمه‌سئیدی بلکه ده او هئچ نه بیلمزدی. بو اؤزونو ترپتنه ائو تلفونونو گؤتورموشدو. اونون باخیشیندان، بونون اوره‌یی قیریلیب دوشموشدو ایچینه. پؤرتمه‌سینی گؤرمه‌سین دئیه مطبخه گیرمیشدی. یالاندان قاب ـ قاشیقلا اوینامیشدی. اودا دالیسیجا گئتمیشدی مطبخه.
ـ او یئنه آیری قالیر! اوجادان سورموشدو.
ـ بیزه نه آخی! هره اؤز ائوینین قیبله‌سینی هامیدان یاخشی بیلر.
بودا آخیر نقطه‌سینی قویموشدو. آمما کی بونون نقطه‌سی، نقطه ده‌ییردی؛ زورایله ویرگول اولا بیلیردی، آخی او هله تازا جومله‌لره باشلامیشدی.
ـ نئجه بیزه نه، سن‌له کیمین ایلگیسی اولسا منه ده مربوط‌دی.
ـ اؤتور بو سؤزلری مه‌یر من اوشاغام.
ـ سن اوشاقدان دا پیس‌سن.
دئمیشدی. بو دا اوره‌یینده کاشکی من ائله اوشاق اولاردیم دئیه، یئنه تر بوتؤو گؤوده‌سینی آلمیشدی. بیلمیردی اونون اؤلچولرایله پاستوریزه، هموژنیزه آداملاری هاردان تاپمالیدی. اوندا اونلارا دا آیری آد قویاردی.
اولمایا هر کیمسه‌ایله اولاندا بیلمه‌دن ائله اونا تای اولوردوم؟ اوندا نیگاران قالماغا لاپ حاقلی اولوردو. آخی مه‌یر من کرتنکله‌دن زاددانام کی رنگدن رنگه دؤنم؛ اؤز اؤزونه دوشونموشدو.
سن آیری آداملاردان قورخماق یئرینه، اؤزوندن بیرده سؤزلر و ایشلریندن قورخسان هئچ نه اولماز؛ دئییب ـ دئمه‌میش دیلینی بتردن دیشلمیشدی.
آغزی ـ بورنونون قانینی داها ییغیشدیرا بیلمیردی.