چئویرن: رقیه کبیری
ترجمه: رقیه کبیری
رقیه کبیری

IMG_1403
بو قاپی هئچ چالینمایاجاق
رقیه کبیری

«اؤزووو سَریمه، آخی قارین دا اییسی اولار؟ اؤزو ده نمنه‌ده؟ یون یورقانیندا! گئنه دئسن قویون اییسی گلیر، بیر سؤزه اوخشار!»
بو، نرگیزین همیشه‌کی سؤزویدو. او، تازا اوز- آستارلانمیش یورقانی اییله‌ییب، «قار قوخوسو گلیر» دئینده، همیشه قوخولاری دویماق اوستونده سؤزلری چپ گلردی. نرگیز شمعدانی گولونو سئوسه‌یدی ده، یورقانین قار قوخوسو تک، شمعدانی‌نین دا قوخوسونو دویمازدی.
«یانی نمنه شمعدانی‌دان تورش اییسی گلیر؟ بولوسن بورون حیسّی‌نن دیل حیسّی‌نین نه قدر فرقی وار؟  دوز کیشی‌نن آرواد کیمی…»
یورقانینی بوُرنونا توتوب، اییله‌ییر. اونا ائله گلیر کی، پرستارین اسپرئیی‌نین قوخوسو دا یورقانین قار قوخوسونا قاریشیبدی. ایکیندی چاغی پرستار یورقانی اوز- آستارلایاندا، اویسا نرگیزین یاتاغی‌نین کناریندا اوتوروب، فیکری پرستارین اللرینده قالمیشدی. پرستارسا ائله ناشی‌یانا یورقانین اوزونو تیکیردی کی، بیر- ایکی دفه ایینه‌ بارماغینا باتمیشدی.
اوشویور. یورقانی باشینا چکیر. نفسی یورقانا ده‌یدیکده بورنونون اوجو قیزیشیر. یورقانی باشیندان سیییریب، سینه‌سینه‌جن آشاغی چکیر. نظرینه گلیر بیلینمز بیر یئردن کولک اوتاغینا دولور.
«آخی، یایین آخیر آییندا بئله ده اوشوتمه اولار؟»
فیکیرلرینی ائله اوجا سسله دیلینه گتیریر کی، اوزاقدان ائشیدن اولسا دئیر بَه یورقانین آلتیندا اوندان ساوایی آیری بیر آدام دا وار. هله اوشوتمه‌ بیر یانا، یورقاندان قالخان اسپرئیین اییسی عاغلینی قاریشدیریب. بالینجی باغرینا باسیب، کیپریکلرینی بیر- بیرینه سیخیر. آمما گئنه ده گؤزو یوخویا قیزیشمیر. پرستار بال آریسی تک بورنونون اوستونده ویزیلداییر.
«دا سن اییله‌مه‌یین لاپ شورونو چیخاتدین. آخی بال دا کهلیک‌اوتو اییسی وئرر؟ هئچ اولماسا دئنه‌ کهلیک‌اوتو دادی وئریر!»، نرگیز دئمیشدی.
بال آریسی‌نین گؤزلری‌نین رنگی ده نرگیزین گؤزلری‌نین رنگینده‌دیر. آمما نسه بو گونلر نرگیزین گؤزلری‌نین آلا- چن آغلیغینا، بال رنگلی ببک‌لرینه اؤلوم توزو سپیلیب.
تنبل‌- تنبل یئریندن قالخیب، یورقانین آلتیندان چیخدیقدا گئنه ده جانی گیزیلده‌ییب. اوشویور. سحر تئزدن گؤزو نرگیزین ناخوش اوزونه ساتاشماسینی ایستمه‌سه ده، آغیر- آغیر اونون اوتاغینا گئدیر. نرگیزسه هله یوخودادیر. یورقانی اوستوندن کنارا چکیلیب. اویسا هله ده بال آریسی باشیندا ویزیلدایاراق، نرگیزین سویو چکیلمیش دریسینه، یوخودا تیتره‌ین انگینیه باخیر. بال آریسینی ذهنینده دولاندیردیغینا گؤره اؤزوندن اوتانیر. الینی اوزالدیب، یورقانی نرگیزین اوستونه چکیر. سونرا دوشا ساری گئدیر. هر نه قدر بال آریسی‌نین دوشدان ائشیکده قالدیغینی ایسته‌سه بئله، آنجاق بال آریسی گئنه ده دوش آلتیندا ویزیلداییر.
ائیواندا اوتوروب، الینده کیتاب، گؤزآلتی پنجره‌‌ آرخاسیندان نرگیزین اوتاغینی سوزور. پرستار، نرگیزین یاتاغی اطرافیندا وار- گل ائدیر. ائیوانا دوزلموش شمعدانیلارین تورشا چالان اییسی بورنونا دولور. شمعدانی نرگیزین ان چوخ سئودییی گولدور. لاکین ناخوشلوق یاتاغینا دوشندن بری گوللری ده بیر چوخ شئی‌لر کیمی اونودوب. آمما او، هله ده هر گون شمعدانیلاری سوواریر. یاز فصلینده گولدانلارین تورپاقلارینی ده‌ییشیر، سارالمیش یارپاقلاری، سولموش گوللری قوپاریب، شمعدانیلاری طراوتلی ساخلاماغا چالیشیر. پرستار نرگیزین قوللاریندان توتوب، اونو یاتاغیندا اوتوردور.
ایچینده آدسیز- سانسیز، آنلاشیلماز بیر حیس جانلانماقدادیر. دامارلاریندا تلاطم وار. دالغالار ساحیله چیرپیلان کیمی، قان دامارلارینا چیرپیلیر. نبضی تئز- تئز وورور. الینی بوینونون دامارینا چکیر. بیله‌یی‌نین داماری تک او دا تئز- تئز وورور. گؤزلرینی پنجره‌دن یاییندیریب، شمعدانیلارا زیلله‌ییر. بو گونه‌جن بال آریسینی شمعدانی گولونون اوستونه قونموش گؤرمه‌ییب. بلکه ده گؤروب، آمما ایندی‌یه‌جن بال آریسی ذهنینده بئله سسلی ویزیلدامامیشدی.
پرستار چرقدینی قولاقلاری‌نین دالیسیندان کئچیردیب، تپه‌سی اوسته دویونله‌ییب، نرگیزی یاتاغی‌نین قیراغینداکی اوتوراجاقدا اوتورتماغا چالیشیر. آنجاق نه ائدیرسه نرگیزی تک‌باشینا قالدیرماغا گوجو چاتمیر. پرستارا یاردیم ائتمک اوچون، کیتابی ائیوانداکی صندلین اوستوته قویوب، اوتاغا گیریر. نرگیزی صندل اوستونده اوتوردوب، کورکلرینی اوووشدورور. پرستار تله‌سیک حالدا یاتاغین ملفه‌سینی دَییشیب، یورقانی ساهمانلاییر. نرگیزین چیین‌لرین اووشدورا- اوشدورا گؤزو پرستارین چئویک ایشله‌ین اللرینده، نازیک و اوزون بارماقلاریندا، پارلاق دیرناقلاریندا قالیب، پرستارین اللرینی اللری ایچینه آلیب، بارماغینی اونون اوزوکسوز بارماقلارینا، دیرناقلارینی اونون دیرناقلاری آلتینا سورتمه‌یی، بیربه‌بیر اؤپمه‌یی گلیر. گؤزو نرگیزین پارکینسون ناخوشلوغوندان ساری پول‌سایان کیمی تیترک اللرینه توخوناندا، بیر داها اؤزوندن اوتانیر. نرگیزین بارماقلاری ساعاتین منظم ثانیه‌سایاری تک آتیلیر. صندلین آرخاسیندان اییلیب، نرگیزین اؤلو الینه اوخشار اللرینی اللری آراسینا آلیر. ایچ- ایچه توخونموش اللر بو دفه بیرگه تیتره‌ییر. بونونلا بئله ایکیسی‌نین ده گؤزلری پرستارین اللرینه زیلله‌نیب.
نرگیز یاتاغیندا یاتیب، کؤپوکلو سو تیترک انگیندن یاسدیغینا ساری سوزوب. او هر گونکی کیمی یاتاغین قیراغینداکی صندلده اوتورب، الینده کیتاب، ائوده وار- گل ائدن پرستاری گؤزآلتی سوزور. پرستارین اسپرئیی‌نین قوخوسو ائوین هر یئرینده دوُیولور. سانکی بال آریسی قوندوغو گوللرین اییسینی ده هر آددیم آتدیقجا هاوایا سپه‌له‌ییر. اونا باخدیقجا، گئنه ده ایچینده خوش بیر حیس اویانیر. هاوداکی اکسیژن ذرّه‌لرینی بئله اؤپمه‌یی گلیر. پرستارسا اورکن باخیشلاریلا اونا باخیب، سونوندا کیشی‌نین باخیش دایره‌سیندن چیخیب، گئدیر. کیشی‌نین باخیشی دا اونون آرخاسیجا سورونور. مأیوس- مأیوس پرستارین دؤنوشونو گؤزله‌ییر.
نرگیزین آغزیندان سوزولن کؤپوکلو سویو دسمال ‌ایله سیلیر. نرگیزین یورقان- دؤشه‌یی، پالتارلاری، جانی، حتی آغزیندان سوزولن کؤپوکلر اؤلوم قوخویور. نرگیز دوغرو- دوروست دانیشا بیلسه‌یدی یقین دئیردی:
«اؤزووو سریمه. هاردا گؤرموسن دیری آدام اؤلو اییسی وئرسین؟ سنین کیمی تولا بورون گؤرمه‌میشم، واللاه..!»
نرگیز نه دیری‌ کیمی دیری‌دی، نه ده اؤلو کیمی اؤلو. اؤلومله یاشام آراسیندا آسیلی قالمیش بیر ات پارچاسی‌دی. کیشی‌نین بیر آن اوره‌ییندن کئچیر کی کاش نرگیز سونسوز بیر کومایا جوماردی. اوندا داها هئچ بیریسی عذاب چکمزدی بلکه…
پرستار نرگیزین یئمه‌یینی یئدیردیر. آز- آز، قاشیق- قاشیق اونون آغزینا یئمک قویور. نرگیزین انگی ائله تیتره‌ییر کی، دئیه‌سن جاندان دوشموش نیوکاسل خسته‌لی‌ینه بولاشان تویوقدور، قاشیغی دیمدیکله‌ییر. اویسا صندلده اوتوروب، باخیر… پرستارین گیرده چنه‌سی، خوش گؤرونوشلو زنخدانی، آغ بوخاغی… و باخیشی پرستارین سینه‌سیندن آشاغی سوزدوکده، قفیلدن ایچینده بیر تلاطم قوپور. گئنه ده قان آخیمی اوزونو اونون دامارلارینا چیرپیر. نرگیز قویودان باخان گؤزلریله اونا باخیر. کیشی‌یه ائله گلیر کی، نرگیز باخیشیلا اونو قیناییر. نرگیزین باخیشیندان اوتانیب، گؤزونو کیتابا زیلله‌ییر. پارکینسون خسته‌لی‌یی نرگیزی عاجیزلشدیرسه بئله، آنجاق اونون دیققتینی هله الیندن آلماییب.
پرستار نرگیزی تختینده اوتوردوب، پالتارینی دییشیب، ساچلارینی داراییر. او، قولو قولتوغوندا قاپی‌نین چرچیوه‌سینه دایانیب، باخیر. نرگیزه باخدیقدا، اونو یوخ، اؤز نیسگیللرینی گؤرور.
بو گون نرگیزین باشی‌نین تیتره‌ییشی گونده‌کیندن آرتیق گؤزونه گلیر. نرگیز دیل- دوداغی آلتدا نسه بیر سؤزلر دئییر. ایسته‌مه‌دن نرگیزله پرستاری بیر- بیری‌ایله مقایسه ائله‌ییر. پرستار چوخ دا جوان دئییل. آمما طراوتلی‌دیر. حرکت‌لری، نرگیزین تیتره‌ین بدنینین یانیندا استقامت‌لی گؤرونور. ذهنینده بیر شعر ویزیلدانیر: «بی‌نیش، عسل که خورد از این کندو؟». نرگیز اونون ذهنیندن کئچن شعری ائشیتمیش کیمی، دؤنوب، غضبله اونا ساری باخیر. پرستار ایسه اؤزونو ایتیرمیش کیمی الینده داراق، هویوخوب قالیر. نرگیزین دانیشماغا انگی توتماسا دا، دورمادان بیر سیرا آنلامسیز سؤزلری دَن کیمی آغزیندان ائشیه تؤکور. تیترک الینی گاه اونا ساری، گاهدانسا پرستارا دوغرو توتوب، دانیشیر. گؤز یاشی یاناغینا سوزور. پرستار اونون گؤز یاشینی سیلدیکده، نرگیز تیترک الی‌له دسمالی اونون الیندن چکیب، یئره توللاییر. شعرین سؤزلری کیشی‌نین آغیندا آجی‌یا چالیر. سؤزلر ییخیق دووارین کرپیچلری تک، بوغازی‌نین یولونو توتور.
نرگیزه ساری گئدیب، اونون اللرینی اؤز اللرینه آلیر. آمما نرگیز الینی اونون اللریندن چکیب، تیترک بارماقلارینی اؤنجه پرستارا، سونرا قاپیا ساری توتور. اوز- گؤزوندن غضب یاغیر. پرستارسا باشی آشاغی اوتاقدان چیخیر. نرگیز هؤنکور- هؤنکور آغلاییر. تیترک باشی بدنیندن قوپاجاق کیمی گؤرونور…
بوز کیمی سویوق یاتاغیندا اوتورب، یورقانی باغرینا باسیب، نه قار قوخوسونو دوُیور، نه ده پرستارین اسپرئیی‌نین اییسینی. هله ده نرگیزین غضبلی باخیشی ذهنی‌نین آیناسینا میسمارلانیب، قالیر.
بو گئجه، باشقا گئجه‌لرین عکسینه، گؤزونو یومماق همین، نرگیزین آغزیندان چیخان آنلاشیلماز سؤزلر تسبئح دنه‌لری تک گؤزونون قاباغینا دوزولور. قارما- قاریشیق دویغولارلا اَل‌به‌یاخادیر. باشیندا اوچان دویغولار بیر- بیریله دالاشیر، دؤیوشور، دئییشیر، باریشیر و…
دان یئری سؤکولنده دؤیوشده یئنیلمیش یورغون- آرغین، دویوشکن بیر آدام حالیندا حیس ائدیر اؤزونو. یئریندن قالخیر. یاتاغی کیفسنمیش قوخویور. نرگیزین اوتاغینا باش چکمه‌دن دوشا ساری یوللانیر.
ساعات گون‌اورتانی گؤستریر. نرگیز یاتاغیندا اوزانیب. قویودان باخان گؤزلرینی تاغا زیلله‌ییب. تیترک انگیندن آخان کؤپوکلو سو یاسدیغینا سوزوب. کیشی‌نین آیاغی گلمیر نرگیزین اوتاغینا گئتسین. ائیواندا اوتوروب، گؤزو قاپیدا، شمعدانی‌لارین تورش اییسی سینه‌سینی آجیشدیریر…

بیرینجی ائدیت: ۱۳۸۷- جی ایلین یایی
ایکینجی ائدیت:۱۰/۱/۱۳۹۴

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

بو قاپی هئچ چالینمایاجاق / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

بو قاپی هئچ چالینمایاجاق / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

بو قاپی هئچ چالینمایاجاق / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی